काठमाडौं । लेखक तथा बालसहित्यकार शान्ता दाहालले बालमनोविज्ञान बुझेर बालबालिकासँग व्यवहार गर्नुपर्ने बताउनुभएको छ ।
काठमाडौंको बूढानीलकण्ठ–१० बालुवाखानीमा रहेको फेरिल्याण्ड इन्टरनेसनल स्कुलले आयोजना गरेको अभिभावक अभिमुखिकरण कार्यक्रममा लेखक दाहालले बालबालिकाको मनोविज्ञान बुझेर सोही अनुसार व्यवहार गर्न अभिभावकहरुसँग आग्रह गर्नुभएको हो ।
‘अभिभावकहरुले समय अनुसार आफ्ना बाबु नानीहरुलाई हौसला दिँदै २१ औँ सताब्दी सुहाउँदो शिक्षा प्रदान गर्न आवश्यक छ’ दाहालले भन्नुभयो, ‘बालमनोवृतिमा असर नपर्ने गरी बालमैत्री वातावरणमा अगाडि बढ्न उनीहरुलाई सधैँ उत्प्ररित गर्नुपर्छ ।’
प्रशिक्षक दाहालले विद्यालयमा आफूले प्रत्येक हप्ता अभिभावक, शिक्षक र बालबालिकाहरुका लागि बालमनोविज्ञान सम्बन्धी सचेतना कक्षा सञ्चालन गर्ने जानकारी पनि दिनुभयो ।
कार्यक्रममा विद्यालयका प्रिन्सिपल विष्णुचन्द्र अधिकारीले कोभिडका कारण शिक्षा क्षेत्र खास गरी विद्यालय शिक्षामा परेको असरलाई कसरी प्रभावकारी तरिकाले कम गर्न सकिन्छ भन्ने बारे धारणा राख्नुभएको थियो । उहाँले विद्यालय भौतिक रूपमा सञ्चालन भइरहेको अवस्थामा शिक्षक शिक्षिकाहरुले समय अनुसार डिजिटल तथा वैज्ञानिक तरिकाले विद्यार्थी भाइबहिनीहरुलाई प्रशिक्षित गर्नुपर्नेमा जोड दिनुभयो ।
त्यस्तै, विद्यालयका निर्देशक राम प्रसाद गौतमले बालबालिकालाई अहिलेको भयावह स्थितिबाट जोगाउन शिक्षक शिक्षिका तथा अभिभावकहरुले सचेत हुँदै कर्तव्य निर्वाह गर्नुको विकल्प छैन भन्नुभयो ।
कार्यक्रममा विद्यालयका निर्देशक विनोद अधिकारीले विद्यार्थीहरुको मनोविज्ञान बुझेर विद्यार्थीहरुको चौतर्फी विकासका लागि सबैले आ आफ्नो भूमिका निर्वाह गर्न आग्रह गर्नुभयो ।
सो अभिमुखिकरण कार्यक्रममा विद्यालयका शिक्षक शिक्षिकासहित कक्षा प्ले ग्रुपदेखि ५ सम्मका करिब २०० भन्दा बढी अभिभावकहरुको सक्रिय सहभागिता रहेको थियो ।
