बेल बहादुर रजाली, जयपुर ।
मूल प्रवाह अखिल भारत नेपाली एकता समाज आठौं भारत सम्मेलनको सन्देश सभा जयपुरमा सम्पन्न भएको छ । १३ मार्च २०२२ का दिन मूल प्रवाह नगर समिति जयपुर उत्तर एवं दक्षिणको आयोजनामा सन्देश सभाको आयोजना गरिएको हो।
कार्यक्रमलाई सम्बोधन गर्दै समाजका केन्द्रीय सदस्य मोहन गिरीले मूल प्रवाह अखिल भारत नेपाली एकता समाजले अनुशासनको कारबाही गरेका व्यक्तिहरुले केही ठाउँमा संगठनको नाम र लोगो दुरुपयोग गरेको बताउनुभयो । उनीहरुले झुठको खेती गरेपनि जनता र कार्यकर्ताबाट एक्लिँदै गएको बताउनुभयो ।
गिरीले साम्राज्यवादीको दलाल सरकारले एमसीसी सदनबाट पास गरे पनि जनताले सडकबाट आन्दोलनको माध्यमबाट अस्वीकार गरी सकेको बताउनु भयो । उहाँले एमसीसी खारेज नहुँदासम्म आन्दोलन नरोकिने बताउनु भयो ।
अर्का अतिथि मूल प्रवाह अखिल भारत नेपाली एकता समाजका केन्द्रीय सदस्य तथा मध्यपश्चिमोत्तर क्षेत्रीय समितिका अध्यक्ष बेल बहादुर रजालीले कार्यक्रममा सम्बोधन गर्दै कुनै पनि संगठनले निरन्तर अगाडि बढ्नका लागि त्यसको ठोस लक्ष्य उद्देश्य दर्शन नीति कार्यक्रम हुनुपर्ने बताउनुभयो । मूल प्रवाह अखिल भारत नेपाली एकता समाजको आफ्नोे स्पष्ट दृष्टिकोण लक्ष्य उद्देश्य भएका कारण निरन्तर अगाडि बढिरहेको बताउनुभयो ।
मूल प्रवाहले एकातिर भारतमा बस्ने प्रवासी नेपालीहरूको हक हित र अधिकारको रक्षाको लागि संघर्ष गरिरहेको र अर्कोतिर देशमा लोकतन्त्र र प्रजातन्त्रको पक्षमा चल्ने आन्दोलनमा पनि यसको महत्वपूर्ण भूमिका रहँदै आएको बताउनु भयो ।
कार्यक्रममा समाजका मध्य पश्चिमोत्तर क्षेत्रीय समिति सचिव नारायण ज्ञवाली, केन्द्रीय परिषद सदस्य दीपा थापा, महिला विभाग क्षेत्रीय अध्यक्ष कल्पना थापाको पनि आतिथ्यता रहेको थियो ।
यस्तै, मूल प्रवाह अखिल भारत नेपाली एकता समाज नगर समिती जयपुर दक्षिणका हुम बहादुर सारु, जयपुर उत्तरका दिल बहादुर कुमाल, महिला विभाग जयपुर दक्षिणकी सचिव माया थापा, मानसरोवर पत्रकार टोल समितिबाट सुनिता परियारले पनि आफ्नो भनाइ राख्नु भएको थियो ।
कार्यक्रम ओम थापाको अध्यक्षता, टंक थापाको सञ्चालन र रिम रानाको स्वागत मन्तव्यबाट अघि बढेको थियो भने सहिदहरूको सम्झनामा एक मिनेट मौन धारण गरिएको थियो ।
