मस्कट । “जागौँ नारी समान अधिकार ल्याउनलाई, उठौँ नारी हातमा हात मिलाई न्याय पाउनलाई” भन्ने मूल नाराका साथ ओमन नेपाली एकता समाजको आयोजनामा एक सय बारौँ अन्तर्राष्ट्रिय नारी दिवस मनाइएको छ ।
मार्च ११, २०२२ शुक्रबार मस्कटस्थित अलरिफ होटेलमा सम्पन्न कार्यक्रमका प्रमुख अतिथि तथा प्रशिक्षक अन्तर्राष्ट्रिय नेपाली एकता समाजका सदस्य छविलाल बस्नेतले ब्यानर खोलेर कार्यक्रम उद्घाटन गर्नुभएको थियो । सो अवसरमा कार्यक्रमलाई सम्बोधन गर्दै उहाँले समाजमा व्याप्त अन्धविश्वास कुरीति र महिलाहरूलाई मेसिनको रूपमा प्रयोग गरिने अवस्था अहिले पनि रहेको बताउनुभयो ।
अठारौँ सताब्दीका महिलाहरूले पुरुषसरह समान हक र अधिकारका निमित्त सुरु गरेको आन्दोलनबाट अहिले आएर संसारभरिका महिलाहरूको स्थितिमा पहिलाभन्दा सुधार भएको बताउनुभयो ।
महिला विभागकी अध्यक्ष लक्ष्मी रायमाझीको अध्यक्षता तथा मनु सुनार र शालिकराम आचार्यको सञ्चालनमा सम्पनन उक्त कार्यक्रममा स्वागत मन्तव्य रमा बराइलीले गर्नुभएको थियो । रक्तिम परिवार ओमानको टिमले स्वागत गीतबाट हलमा उपस्थित सम्पूर्ण दर्शकलाई स्वागत गरेको थियो । ज्ञातअज्ञात सहिदप्रति एक मिनेट मौनधारणका साथै कार्यक्रममा अन्तर्राष्ट्रिय गीत बजाएर कार्यक्रम सुरुआत गरिएको थियो ।
कार्यक्रममा माया रिजाल, राम मिश्र, उत्तम बम, विष्णु अधिकारी, जितबहादुर राना, कला थापा, गौरीशङ्कर यादव, खारसिङ गुरुङ, रोजी श्रेष्ठ, धनबहादुर विकलाई प्रमुख अतिथि छविलाल बस्नेतबाट सदस्यता प्रदान गरियको थियो ।
कार्यक्रमको प्रायोजक युनिमनीले उपस्थितमध्येबाट गोलाप्रथा गराएर आकाश नेपाली, माया राई र बिस्नु अधिकारीलाई मायाको चिनो प्रदान गरेको थियो ।
कार्यक्रममा ओमान नेपाली एकता समाजका सदस्य तथा शुभचिन्तकहरूको व्यापक उपस्थिति थियो । कोरोना महामारीका कारण लामो समयसम्म भेटघाट हुन नसकेका आम शुभचिन्तक तथा एकता समाजका सदस्यहरू रक्तिम परिवार ओमानको प्रस्तुतिमा झुमेका थिए ।
