जनकपुरधाम । जनकपुरमा सामूहिक विवाह गर्दागर्दै मञ्च भत्किएको छ । १०८ जोडीको सामुहिक विवाहका लागि तयार पारिएको मञ्च स्वयम्वरकै बेला भत्किएको हो ।
सोमबार साँझ स्वयम्वरको लागि ५१ जोडी बेहुला र बेहुली मञ्चमा तयार भएर बसेको बेला एकाएक मञ्च भत्किएको थियो । दाइजो प्रथा विरुद्ध विश्व हिन्दु परिषदले १०८ जोडीको सामूहिक विवाह गराउने तयारी गरेपनि कार्यक्रममा ५१ जोडी सरिक भए ।
मञ्च भत्किएपछि बेहुला बेहुलीलाई समान्य चोटपटक लागेको छ । त्यस क्रममा एकजना बेहुली केहीबेर बेहोस् भइन् । उनी सामान्य अवस्थामा आएपछि फेरि विावहको कार्यक्रम अघि बढाइएको छ । सामूहिक विवाह हेर्न आएका सहभागी मञ्च भत्किएपछि भागाभाग गरेका थिए । त्यसक्रममा केहीलाई सामान्य चोट लागेको छ ।
दाइजो प्रथाविरुद्ध आयोजना गरिएको सामूहिक विवाहका लागि चाहिने समान, बेहुला बेहुलीको लुगा कपडा, मंगलशुत्र सबै परिषदले नै व्यवस्था गरेको छ ।
