कुवेत । कुवेत नेपाली एकता समाजका महासचिव खुम रायमाझीले नेपाल सरकारले कुवेतस्थित नेपाली कामदारको तलब परिमार्जन गर्नुपर्ने आवश्यकतामा जोड दिनुभएको छ ।
कुवेत र नेपालमाझ कूटनीतिक सम्बन्ध स्थापना भएको पचासौँ वर्षप्रवेशको अवसरमा २०७८ फागुन १३ गते कुवेतस्थित नेपाली दूतावास परिसरमा आयोजित कार्यक्रममा मन्तव्य राख्दै उहाँले यस्तो अभिव्यक्ति दिनुभएको हो ।
सो अवसरमा आयोजित “आप्रवासी नेपाली श्रमिकको दृष्टिमा आजको बैदेसिक रोजगार : अनुभव र अवसरहरू” विषयक अन्तरक्रियामा समाजको तर्फबाट धारणा राख्दै उहाँले फिलिपिन्स सरकारले आफ्नो श्रमबजारमा कडाइ गरेपछि कुवेतलगायतका खाडी क्षेत्रका कम्पनीहरूको पहिलो आकर्षण नेपाली श्रमिक रहेको पनि बताउनुभयो ।
‘तर नेपाली श्रमिकप्रतिको आकर्षणको तुलनामा तलब भने आकर्षक रहेको छैन’ महासचिव रायमाझीको भनाइ थियो ।
महासचिव रायमाझीले सम्बोधनको क्रममा विदेशस्थित नेपालीहरूका लागि मतदान र समानुपातिक मताधिकार तुरन्त लागु गर्नुपर्ने आवश्यकतामा जोड दिनुभयो ।
‘सर्वोच्च अदालतले मताधिकारको व्यवस्था गर्न आदेश दिइसकेको छ’ उहाँले भन्नुभयो– ‘नेपाल सरकारले मताधिकारको व्यवस्था गरिहाल्नुपर्दछ । त्यस काममा दूतावासहरूले पनि भूमिका निर्वाह गर्नुभयो ।’
सम्बोधनको क्रममा उहाँले कतिपय नेपाली गैरकानुनी काममा संलग्न रहेकाले त्यसबाट उनीहरूलाई बचाउन नेपाली सङ्गठनहरूले चेतनामूलक कार्यक्रम सञ्चालन गर्नुपर्ने आवश्यकतामा जोड दिनुभयो ।
त्यस्तै, उहाँले कुवेतबाट नेपालमा उच्चस्तरीय भ्रमण हुन सकेमा नेपालको व्यापार प्रवर्धन हुन सक्ने धारणा पनि व्यक्त गर्नुभयो ।
कार्यक्रमको उद्घाटन कुवेतका लागि नेपाली राजदूत दुर्गाप्रसाद भण्डारीले पानसमा बत्ती बालेर उद्घाटन गर्नुभएको थियो ।
दूतावासका मिनिस्टर काउन्सेलर प्रकाशमणि पौडेलले स्वागत गर्नुभएको उक्त कार्यक्रममा गैरआवासी नेपाली सङ्घ राष्ट्रिय समन्वय परिषद् कुवेतका अध्यक्ष रणध्वज लामालगायतले पनि मन्तव्य राख्नुभएको थियो ।
नेपाल र कुवेतका माझमा सन् १९७२ मा कूटनीतिक सम्बन्ध कायम भएको थियो ।
