काठमाडौँ । मुलुकको कुल ऋण १७ खर्ब नाघेको छ । पुस मसान्तसम्मको तथ्याङ्कमा यो स्थिति देखिएको हो ।

सार्वजनिक ऋण व्यवस्थापन कार्यालयका अनुसार २०७८ पुस मसान्तसम्म कुल सरकारी ऋण १७ खर्ब २८ अर्ब ९३ करोड पुगेको छ । यस रकममध्ये बाह्य ऋण ९ खर्ब ४८ अर्ब ९८ करोड र आन्तरिक ऋण ७ खर्ब ७९ अर्ब ९४ करोड रहेको छ ।

कार्यालयले प्रकाशित गरेको प्रतिवेदनअनुसार आर्थिक वर्ष २०७८÷७९ को छ महिनामा नेपाल सरकारको कुल कर्जा ०.३३ प्रतिशतले बढेको छ । विदेशी ऋण भने ०.०३ प्रतिशतले घटेको छ ।

विदेशी ऋण अमेरिकी डलर उतावचढाव भएका कारणले घटेको दाबी गरिएको छ । त्यस्तै, आन्तरिक ऋण भने ०.७८ प्रतिशतले बढेको छ ।
समीक्षा अवधिमा कुल आन्तरिक कर्जा ६ अर्ब रुपैयाँ वृद्धि भएको छ भने बाह्य ऋणको स्थिति २४ करोड ८३ लाख ९० हजारले घटेको छ ।
विनिमय दरमा भएको उतारचढावले चालु त्रैमासिकमा १६ अर्ब ४७ करोड रुपैयाँको विनिमय लाभ भएको छ । यसले गर्दा बक्यौता कर्जाको स्थितिमा कमी आएको छ ।

त्यसैगरी, आर्थिक वर्ष २०७८÷७९ को पुस मसान्तसम्ममा कुल ऋणसँग जी.डी.पी. (कुल ग्राहस्थ उत्पादन) अनुपात ४०.५३ प्रतिशत रहेको छ भने बाह्य ऋणसँग जी.डी.पी. अनुपात १८.२८ प्रतिशत र आन्तरिक ऋणसँग जी.डी.पी. अनुपात २२.२४ प्रतिशत रहेको छ ।

त्यस्तै, आर्थिक वर्ष २०७८÷७९ को दोस्रो त्रैमासमा कुल कर्जाप्राप्ति २९ अर्ब १७ करोड रुपैयाँ रहेको छ । यसमा २३ अर्ब १७ करोड रुपैयाँ बाह्य स्रोतबाट र ६ अर्ब रुपैयाँ आन्तरिक स्रोतबाट प्राप्त भएको जानकारी दिइएको छ ।

वैदेशिक ऋणमध्ये ८७.३७ प्रतिशत अर्थात् २० अर्ब २४ करोड रुपैयाँ बहुपक्षीय स्रोतबाट र बाँकी १२.६३ प्रतिशत अर्थात् २.९२ प्रतिशत द्विपक्षीय स्रोतबाट प्राप्त भएको छ । यो त्रैमासिक अवधिमा कुल आन्तरिक ऋण ६ अर्ब रुपैयाँ ट्रेजरी बिलको नयाँ निष्कासनबाट प्राप्त भएको छ ।