काठमाडौं । गृह मन्त्रालयले अनधिकृतरुपमा विद्यार्थीलाई विदेश पठाउने विभिन्न व्यक्ति तथा संस्थाहरुलाई कारबाही गर्ने चेतावनी दिएको छ।
गृह मन्त्रालयले सोमबार विज्ञप्ति प्रकाशित गरी विदेश जाँदा सम्बन्धित देश, शैक्षिक संस्थाहरुले निर्धारण गरेको प्रक्रिया पुरा नगरी जाने, ती देशमा गएर अलपत्र पर्ने तथा कतिपय अवस्थामा नेपालमै फिर्ता हुनुपर्ने गुनासो प्राप्त भएको बताएको छ ।
‘तसर्थ इजाजतपत्र नलिई अनधिकृत रुपमा सञ्चालन भएका शैक्षिक परामर्शदाता संस्थाहरु, अवैध रुपमा विदेशस्थित विभिन्न देशका शैक्षिक संस्थाहरुको प्रतिनिधिको रुपमा कार्य गर्ने व्यक्तिहरु उपर सरकारले निगरानी गरिरहेको छ’ गृहले भनेको छ ।
त्यस्ता गतिविधि गरेको पाइएमा कानुन बमोजिम कारबाही गर्ने पनि गृहले स्पष्ट पारेको छ ।
साथै, वैदेशिक अध्ययनका लागि जाँदा सम्बन्धित देश र शैक्षिक संस्थाहरुले निर्धारण गरेको प्रक्रिया पुरा गरेर जान पनि गृहले सम्बन्धित विद्यार्थीहरुसँग आग्रह गरेको छ ।
