मेघराज रिस्मेली, जापान ।
बागलुङको गलकोटका कमलबहादुर कार्कीलाई जापान सरकारले सम्मान गरेको छ । कोभिड–१९ को महामारी विरुद्ध खटिएका स्वास्थ्यकर्मीको लागि प्रोत्साहन भत्ता र स्वास्थ्य सामग्री संकलनको अभियानमा आर्थिक तथा जिन्सी सहयोग गरेबापत कार्कीलाई जापानको ओसाकाका गभर्नर यासीमुरा हिरोखुमीले सम्मान गर्नुभएको हो ।
गत वर्षदेखि कोरोना महामारीका बिरामीको उपचारमा कार्यरत स्वास्थ्यकर्मीहरूलाई प्रोत्साहन स्वरूप थप आर्थिक सहायता प्रदानका लागि गभर्नर यासिमुराद्वारा संचालन गरिएको आर्थिक संकलन र स्वास्थ्यकर्मीका लागि आवश्यक कोट संकलन अभियानमा कार्कीले आर्थिक तथा जिन्सी सामग्री प्रदान गर्नुभएको थियो ।
सम्मान ग्रहणपछि कार्कीले विदेशी भूमिमा रहेर सामाजिक क्षेत्रमा काम गर्दा र जापान सरकारले त्यसको मूल्यांकन गरेर सम्मान गर्दा अझै सामाजिक क्षेत्रमा काम गर्ने हौसला मिलेको बताउनुभयो ।
व्यवसायी कार्कीले गत वर्षदेखि नै ओसाकाको सरकारले सञ्चालन गरेको अभियानमा सहयोग गर्दै आइरहेको बताउँदै गतवर्ष आर्थिकसहित स्वास्थ्यकर्मीले लगाउने कोट जिन्सीको रूपमा वार्ड अफिसमार्फत प्रदान गरेको बताउनुभयो।
सामाजिक क्रियाकलापमा सक्रिय कार्की बागलुङको गल्कोट नगरपालिका २ नरेठाँटीको भुङ्खानी घर भै बिगत १३ वर्षदेखि जापानको ओसाकामा होटल व्यवसाय सञ्चालन गर्दै आउनुभएको छ ।
करिब ९६ हजार नेपाली सहित २० लाख २८ हजार विदेशी रहेको जापानमा नेपालीहरूले जापान सरकारलाई स्वास्थ्य सकारात्मक सूचना प्रवाह, सार्वजनिक स्थलमा सरसफ़ाइ अभियान सञ्चालन, भाषा अनुवाद लगायत योगदान गरेबापत जापान सरकारका विभिन्न निकायले व्यक्ति तथा संस्थागत रूपमा सम्मानित गर्दै आइरहेको छ ।
