काठमाडौं । प्रहरीले सात हजार किलो बढी अखाद्य महसहित एक जनालाई पक्राउ गरेको छ ।
महानगरीय अपराध महाशाखाले अखाद्य ७ हजार ६ सय किलो महसहित नतिजा प्याकेजिङका सञ्चालक नरेश श्रेष्ठ भन्ने नरबहादुर श्रेष्ठलाई पक्राउ गरेको हो ।
महानगरीय अपराध महाशाखाले खाद्य प्रविधि तथा गुण नियन्त्रण विभागमा परीक्षण गर्दा नतिजा प्याकेजिङले उत्पादन गर्ने मह गुणस्तरहीन भएको र खानयोग्य नभएको प्रमाणित गरेको जनाएको छ ।
विगत ७ वर्षदेखि नतिजा प्याकेजिङले गुणस्तरहीन मह उत्पादन गरी ‘स्पर्श हनी’ लेवल टाँसी बिक्रीवितरण गर्दै आएको प्रहरीले बताएको छ। सो कम्पनीले मह बनाउन प्रयोग हुने कच्चा पदार्थ दाङ, नवलपरासी र चितवनबाट खरिद गरी गुणस्तरहीन मह बनाउने गरेको र सो मह प्रति केजी ६५० का दरले बिक्री गर्दै आएका थिए ।
सो कम्पनीले गुणस्तरहीन मह बनाउनका लागि ३०/३० प्रतिशत ग्लुकोज, चिनी र बाँकी ४० प्रतिशत मह बनाउन प्रयोग गरिने कच्चा पदार्थ मिसाउने गरेको पाइएको छ।
