जुमान सिंह केसी, प्युठान ।
प्युठानको मल्लरानी गाउँपालिकाले हिंसापीडित महिला तथा किशोरीहरुका लागि अल्पकालिन सेवा केन्द्र सञ्चालन गर्ने भएको छ। लुम्बिनी प्रदेशका सभासद हरि रिजालले मंगलबार एक कार्यक्रमबिच सेवा केन्द्रको उद्घाटन गर्नु भएको छ ।

केही वर्ष अगाडिदेखि संघ सस्था तथा सहकारीबाट खलंगामा अल्पकालीन सेवा केन्द्र सञ्चालित हुँदै आएको थियो । नियमित स्रोतको अभावमा पीडित हरुलाई सेवा दिन तथा लिन अप्ठ्यारो परिरहेको अवस्थालाई मध्यनजर गर्दै दीर्घकालीन र नियमित सेवा उपलब्ध गराउनका लागि स्थानीय सरकारबाट सञ्चालन गर्ने निर्णय गरिएको मल्लरानी गाउँपालिका उपाध्यक्ष सरिता जिसीले बताउनु भयो ।

संघीय सरकारबाट सेवा केन्द्रका लागि रु ५ लाख प्राप्त भएको र केही रकम गाउँपालिकाबाट बिनियोजन गरी सेवा केन्द्र सञ्चालन गर्न लागिएको उपाध्यक्ष जिसीले जानकारी दिनुभयो ।

मल्लरानी गाउँपालिकाले ०७८–०७९ मा गाउँ सभाबाट निर्णय भएकोले सेवा केन्द्रलाई सुरुवात गरिएको प्रमुख प्रशासकीय अधिकृत बालकृष्ण थापाले जानकारी दिनु भयो । साथै उहाँले साविकको सदरमुकाम रहेको र जिल्ला स्तरीय सम्बन्धित कार्यालय समेत खलंगामा रहेको हुदा हिंसा पीडितहरुलाई सेवा तथा न्याय प्राप्त गर्न सजिलो हुने भएकोले पनि गाउँपालिकाको ध्यान केन्द्रित भएको बताउनु भयो ।
मल्लरानी गाउँपालिकाले सेवा केन्द्रको नेतृत्व गरेको भएता पनि प्युठान जिल्लाका सबै हिंसा पीडित महिला तथा किशोरी हरुका लागि सेवा दिने गाउँ पालिका अध्यक्ष अमरध्वज रानामगरले बताउनु भयो ।

सेवा केन्द्रबाट न्यायमा पहुच, स्वास्थ्य उपचार सेवा, परामर्श सेवा, आस्रश्र सहितको सुरक्षा तथा अन्य तत्काल दिनु पर्ने सेवाहरु प्रदान गरिने गाउँपालिकाले जनाएको छ।

पालिकामा गठित सेवा केन्द्र सञ्चालन स्थानीय निर्देशन समितिबाट अनुगमन गरी न्यूनतम मापदण्ड पुरा भएको पाइएकोले सेवा केन्द्रलाई सुचारु गर्न लागिएको महिला बालबालिका शाखाका रेवती न्यौपानेले बताउनु भयो।

गाउँपालिकाले तत्काल आवस्यक पर्ने कर्मचारी तथा सामग्रीहरुको व्यवस्था गरेको छ। अझै व्यवस्थित र गुणस्तरीय सेवाका लागि सम्बन्धित निकायहरुमा सहकार्य तथा समन्वय गर्ने निर्णय समेत गरिएको छ।

अब स्थानीय सरकारले नै सेवा केन्द्रको सञ्चालन गरेसँगै हिंसा पीडित तथा प्रभावित महिला तथा किशोरीहरुले सहज र निरन्तर सेवा पाउने आशा गरिएको छ।