डडेल्धुरा । सीमा अतिक्रमण विरुद्ध राष्ट्रिय जनमोर्चा सुदूरपश्चिम प्रदेश समितिले आयोजना गरेको ‘कालापानी मार्च’ डडेल्धुरा पुगेको हो । धनगढीबाट बुधबार अपरान्ह सुरु भएको मोटरसाइकल र्याली साँझ करिब ९ बजे डडेल्धुरा पुगेको छ ।अभियान अन्तर्गत कैलालीको अत्तरियामा कोणसभा सम्पन्न भएको थियो ।
कोणसभालाई अभियान टोलीका नेता एवं राजमो सूदुरपश्चिम प्रदेश समितिका अध्यक्ष नन्दराज भट्ट र प्रदेश समितिका सचिव लक्षीराम आचार्यले सम्बोधन गर्नुभएको छ ।
घोषित कार्यक्रम अन्तर्गत बुडरमा हुने भनिएको कोणसभा समय अभावमा हुन सकेन । त्यहाँ फर्किंदा कार्यक्रम गरिने अध्यक्ष भट्टले बताउनुभयो । ५० जना सम्मिलित नियमित टोलीमा स्थानीय स्तरमा नेता कार्यकर्ताहरु थपिँदै गएको राजमोले जनाएको छ ।
कार्यक्रम उत्साहजनक रुपमा अघि बढेको छ ।अभियानले भोलि डडेल्धुरामा कार्यक्रम गरी अघि बढ्नेछ । त्यस क्रममा खोड्पे, पाटनलगायतका स्थानमा विरोध सभा हुनेछ भने साँझ बास गोकुलेश्वरमा हुनेछ ।
सो टोली दार्चुला सदरमुकामसम्म पुगेर १७ गते महेन्द्रनगरमा समापन समारोह हुनेछ । सो सभालाई अध्यक्ष चित्रबहादुर केसीले सम्बोधन गर्नुहुनेछ ।
भारतले कालापानी, लिपुलेकलगायतका क्षेत्र अतिक्रमण गरी नयाँ नक्सा सार्वजनिक गरेपछि त्यसको विरोधमा राजमोले ‘कालापानी अभियान’ सुरु गरेको हो ।
बुधबार धनगढीमा आयोपजत एक कार्यक्रममा टोली नेता नन्दराज भट्टलाई राजमो केन्द्रीय सदस्य एवं सुदूरपञ्चिम इन्चार्ज मनोज भट्टले नेपालको झण्डा र पार्टीको झण्डा दिएर विदाई गर्नुभएको थियो ।
