काठमाडौं । लामो समयदेखि रोकिएको निजी तथा आवासीय विद्यालयहरुको संगठन ‘प्याव्सन’ काठमाडौंको अधिवेशन यही पुस १६ गते हुने भएको छ । शुक्रबार काठमाडौंको बत्तीसपुतलीस्थित अनुपम फुडल्याण्डमा अधिवेशन हुने उपाध्यक्षका प्रत्यासी एवम् बूढानीलकण्ठ नगरपालिका–१० बालुवाखानीमा रहेको फेरिल्याण्ड इन्टरनेसनल स्कुलका प्रिन्सिपल विष्णुचन्द्र अधिकारीले जानकारी दिनुभएको छ ।
अधिवेशन यही पुस ३ गतेका लागि तोकिएको भएपनि विभिन्न कारणले हुन सकेको थिएन । गएको मंसिर २९ गते उम्मेदवारी दर्ता भएर अधिवेशन स्थगित गरिएको थियो ।
अधिवेशनमा हालका वरिष्ठ उपाध्यक्ष राम बहादुर केसी र उपाध्यक्ष प्रेम राईले अध्यक्षमा उम्मेदवारी दिनुभएको छ ।
यस्तै, वरिष्ठ उपाध्यक्षमा जितबहादुर बस्नेत र नवराज भट्टको दावेदारी छ । उपाध्यक्षमा विष्णुचन्द्र अधिकारीसहित प्रल्हादप्रसाद खनाल, मदनकुमार सुवेदी, सूर्यबहादुर केसी (खत्री) र सूर्यबहादुर भण्डारीले आकांक्षा देखाउनुभएको छ ।
यस्तै, महिला उपाध्यक्षम प्रेमा राई र रीता दाहालको उम्मेदवारी छ भने सचिवमा लोकेन्द्रबहादुर खड्का र सुदर्शन थापाको दावेदारी छ ।
दुई जना निर्वाचित हुने उपाध्यक्ष पदमा उम्मेदवारी दिएका फेरिल्याण्डका प्रिन्सिपल विष्णुचन्द्र अधिकारी २०४७ सालमा प्याव्सनको स्थापना कालदेखि नै विभिन्न पदमा रही जिम्मेवारी बहन गर्दै आउनुभएको छ । हाल उहाँ प्याव्सन काठमाडौंको सदस्य हुनुहुन्छ ।
