काठमाडौं । एपेन्डिसाइटिसको शल्यक्रिया गरेका प्रधानमन्त्री केपी शर्मा ओलीको पेटमा संक्रमण भएको छ । ओलीको एपेन्डिसाइटिस फुटेर संक्रमण भएको अस्पताल स्रोतले जनाएको छ ।
प्रधानमन्त्री ओलीको भेन्टिलेटरमा राखेर उपचार भैरहेको छ । प्रधानमन्त्री ओलीका प्रेस सल्लाहकार सूर्य थापाले भेन्टिलेटरमा राखेर उपचार भएपनि शल्यक्रियापछि कुनै प्रकारको जटिलता नथपिएको बताए ।
सोमबार रातिदेखि पेटमा पीडा भएपछि प्रधानमन्त्री ओलीको मनमोहन कार्डियोथेरासिस भल्कुलर एन्ड ट्रान्सप्लान्ट सेन्टरमा मंगलबार मध्यान्ह एपेन्डिसाइटिसको शल्यक्रिया गरिएको थियो । उनलाई बिहान नौ बजे सेन्टरमा भर्ना गरिएको थियो ।
थापाले ओलीको स्वास्थ्यको पूर्ववत् अवस्थालाई समेत ध्यान दिँदै श्वास प्रश्वासमा कुनै समस्या नआओस भनि भेन्टिलेटरमा राखिएको बताए । तर, अप्रेसन पछि कुनै जटिलता नथपिएको उनको भनाई छ ।
यसैबीच अस्पतालले मंगलबार साँझ जारी गरेको बुलेटिनमा प्रधानमन्त्रीको स्वास्थ्य स्थिति स्थिर रहेको जनाइएको छ ।
अस्पताल स्रोतका अनुसार प्रधानमन्त्री ओलीलाई संक्रमण रोक्नका लागि एन्टिबायोटिक चलाइएको थियो । एन्टिबायोटिकले कति काम गर्छ हेर्नुपर्ने स्रोतले भन्यो । औषधिले राम्रोसँग काम गर्यो भने ३–४ दिनमा प्रधानमन्त्री घर फर्किने अस्पताल स्रोतले जनायो ।
प्रधानमन्त्री ओलीले मृगौला प्रत्यरोपणपछि शरीरमा भएको प्रतिरोधी क्षमता कम गर्ने औषधि नियमित रुपमा लिँदै आएका छन्।
१२ वर्षअघि भारतमा प्रत्यारोपण गरिएको मृगौलाले कम काम गरेपछि प्रधानमन्त्री ओलीको कार्तिक यता चार पटक डायलासिस भैसकेको छ। पछिल्लो डायलासिस शनिबार गरिएको हो।
त्यसअघि मृगौलामा देखिएको एन्टि बडी घटाउन सिंगापुरमा प्लाज्मा फेरेसिस गरिएको थियो।
पूर्व राजाले गरे स्वास्थ्यलाभको कामना
पूर्व राजा ज्ञानेन्द्र शाहले प्रधानमन्त्री केपी शर्मा ओलीको स्वास्थ्यलाभको कामना गरेका छन्।
निजी सचिव पशुपतिभक्त महर्जनले ओलीको स्वास्थ्य अवस्थाबारे जानकारी लिएर पूर्व राजा शाहको तर्फबाट शीघ्र स्वास्थ्य लाभको कामना गरेका हुन्।
शाहले आफ्ना निजी सचिव महर्जनलाई प्रधानमन्त्री ओली उपचाररत त्रिवि मनमोहन कार्डियोथोरासिक भास्कुलर सेन्टर पठाएका थिए।
