काठमाडौं । नेपाल-भारत सीमा सुरक्षा बैठक पोखरामा सम्पन्न भएकाे छ। सीमा विवाद चर्किरहेको बेला तीन दिनसम्म चलेको बैठकमा सीमा अतिक्रमणका बारेमा भने कुरै उठेन ।
सीमा अतिक्रमणको चौतर्फी विरोध भइरहँदा र सरकारले कुटनीतिक पहल गर्ने बताइरहँदा भारतीय पक्षसँग बैठक बसेपनि सीमा मिचिएको विषयले भने प्रवेश नै पाएन ।
बैठकमा सहभागी सशस्त्र प्रहरीका एक अधिकारीका अनुसार बैठकमा सीमामा हुने अपराध नियन्त्रण, विशेष अवस्थामा हुने काम कारवाहीमा समन्वय र पेशागत तालीमबारे छलफल भयो । यस्तै बैठकमा चाडपर्वको बेलामा नागरिकको सुरक्षाको बारेमा पनि छलफल भएको बताइएकाे छ ।
बुधबार सुरु भएर शुक्रबार सम्पन्न भएकाे बैठकमा भारतको तर्फबाट सीमा सुरक्षा बल (एसएसबी) का डिजीको नेतृत्वमा ६ जना सहभागी थिए भने नेपालको तर्फबाट सशस्त्र प्रहरीका आइजी शैलेन्द्र खनालको नेतृत्वमा गृह, परराष्ट्र, नेपाल प्रहरी र राष्ट्रिय अनुसन्धानका पदाधिकारी सहभागी थिए ।
सीमा सुरक्षा बैठक हरेक वर्ष आयोजना गर्ने प्रावधान छ। तर बैठक नियमित हुन सकिरहेको छैन । ०६९ सालयता जम्मा तीनपटक मात्रै नेपाल–भारत सीमा सुरक्षा बैठक बसेको छ । यो चौथो बैठक हो । २०६९ सालमा भारतमा पहिलो बैठक बसेको थियो। त्यसपछि दोस्रो बैठक ०७२ सालमा नेपालमा बसेको थियो । २०७३ साल साउन अन्तिम साता भारतको नयाँदिल्लीमा तेस्रो बैठक बसेको थियो ।
बैठकले पाँचौ नेपाल–भारत समन्वय बैठक आगामी वर्ष भारतमा हुने निर्णय गरेको जनाइएकाे छ ।
