प्रकाश थापा मगर
काठमाडौँ । सीमा अतिक्रमणको विरुद्धमा प्रगतिशील लेखक सङ्घले २०७६ मङ्सिर ६ गते अट्ठाइसौँ परिसंवाद सम्पन्न गरेको छ । “सीमा अतिक्रमणको समस्या र राष्ट्रियता” विषयक सो परिसंवादमा विषयवस्तु प्रस्तोता हुनुहुन्थ्यो– सीमा सरोकार अभियन्ता साध्यबहादुर भण्डारी ।
उपाध्यक्ष गोपीरमण उपाध्यायको अध्यक्षता तथा महासचिव समीर सिंहको सञ्चालनमा अघि बढेको उक्त कार्यक्रममा सीमा अभियन्ता साध्यबहादुर भण्डारीले राष्ट्रिय आत्मसमर्पणवाद अहिले मुलुकको मुख्य समस्या रहेको बताउनुभयो । “अहिले पनि कालापानी–लिपुलेकमा मात्र सीमा अतिक्रमण भएको मानिएको छ” भण्डारीले अगाडि भन्नुभयो– “कालापानी–लिपुलेकमा सीमा अतिक्रमण भएको त खालि छ हजार हेक्टर मात्र हो, वास्तवमा सीमा अतिक्रमण भएको लिम्पियाधुरादेखि कालापानी हुँदै लिपुलेकसम्म हो ।” उहाँले त्यस क्षेत्रमा मात्र ३७ हजार हेक्टरभन्दा बढी सीमा अतिक्रमण भएको बताउनुभयो ।
उहाँले सीमा समस्या समाधान गर्न भारतले डिएसपी पठाउँदा नेपालले इन्स्पेक्टर मात्र पठाउने गरेको बताउँदै राष्ट्रिय आत्मसमर्पणवादी प्रवृत्तिकै कारण भारतसितको सीमा समस्या समाधान हुन नसकेको दावी गर्नुभयो ।
उहाँले देशमा अहिले सीमा अतिक्रमणका विरुद्ध अभूतपूर्व राष्ट्रिय एकता कायम भएको बताउँदै त्यसको समाधानका लागि उच्चस्तरीय गम्भीर पहलकदमी तत्कालै थालनी गरिनुपर्दछ । “सर्वप्रथम त प्रधानमन्त्रीकै नेतृत्वमा उच्चस्तरीय समिति बनाइनुपर्दछ, जसले भारतसित सीमा अतिक्रमण हटाउने गरी वार्ता गरोस्” उहाँले भन्नुभयो– “तथ्य प्रमाणहरू हामीसित प्रशस्त छन्, सक्षम कूटनीतिज्ञ र प्राविधिकको सहयोगमा वार्ता, संवाद अगाडि बढाइनुपर्दछ ।” उहाँले सरकारमा अहिलेसम्म देखा परेको प्रारम्भिक अडान कायमै राखिराख्न देशभक्त जनताले दबाब दिनुपर्ने आवश्यकतामा जोड दिनुभयो ।
प्रलेस केन्द्रीय कार्यालय बागबजारमा आयोजित सो कार्यक्रममा डा. मधुसुदन गिरी, जगत वाशिष्ट, चूडामणि गिरी, शिवधर आचार्य, आनन्द खड्का, प्रा.डा. धु्रव घिमिरे र केशव खड्काले पूरक प्रश्नहरू राख्नुभएको थियो ।
