काठमाडौं । अखिल (छैठौं) ले देशव्यापी संगठन विस्तार गर्ने योजना बनाएको छ । संगठन निर्माणका लागि ‘विद्यालयदेखि विश्व विद्यालयसम्म’ योजना ल्याएको अखिल (छैठौं) का अध्यक्ष देवेन्द्र कुँवरले बताउनुभयो ।

यही मंसिर १ र २ गते वुटवलमा सम्पन्न अखिल (छैठौं) केन्द्रीय समितिको दोस्रो पूर्ण बैठकले आगामी मंसिर १५ देखि पौष ३० सम्म संगठन सुदृढीकरणका लागि ‘विद्यालयदेखि विश्व विद्यालयसम्म’ संगठनात्मक अभियान सञ्चालन गर्ने निर्णय गरेको हो।

अभियानका सन्दर्भमा प्रदेश भेला तथा प्रशिक्षण, जिल्लाका भेला, बैठक तथा प्रशिक्षण, नगर तथा गाउँपालिकाका भेला तथा वैठक र इकाइ स्तरका संगठन निर्माणका अभियानहरु सञ्चालन हुने अखिल (छैठौं) ले जनाएको छ । त्यसका लागि विभिन्न प्रदेशका भेला र सम्मेलनका मितिसमेत तय गरिएको छ ।

अखिल (छैठौं) ले समसामयिम राजनीतिक विषयमा छलफल गरेको छ भने पेट्रोलियम पदार्थमा गरिएको मूल्यवृद्धिविरुद्ध आन्दोलनलाई थप सशक्त बनाउने निर्णय पनि गरेको छ ।

यस्ताे छ विज्ञप्तिकाे पूर्णपाठ

अखिल (छैठौं) केन्द्रीय समितिको दोस्रो पूर्ण बैठक २०७८ मंसिर १ र २ गते वुटवलमा सम्पन्न भयो । बैठकले गरेका निर्णयहरु सार्वजनिक गर्नको लागि यो प्रेस वक्तव्य जारी गरिएको छ ।

१. अखिल (छैठौं)को २२औं राष्ट्रिय सम्मेलन २०७८ असोज २२,२३ र २४ गते रुपन्देहीको वेलवासमा भव्य एवं सानदार रुपमा सम्पन्न भएको समीक्षा भयो ।

२. आगामी मंसिर १५ देखि पौष ३० सम्म संगठन सुदृढीकरणका लागि `विद्यालयदेखि विश्व विद्यालयसम्म´ संगठनात्मक अभियान संचालन गर्ने निर्णय भएको छ । अभियानका सन्दर्भमा प्रदेश भेला तथा प्रशिक्षण, जिल्लाका भेला, बैठक तथा प्रशिक्षण, नगर तथा गाउँपालिकाका भेला तथा वैठक र इकाइ स्तरका संगठन निर्माणका अभियानहरु संचालन हुनेछन् । प्रदेश भेलाका मिति यस प्रकार ठेगान भएका छन् – प्रदेश न. १ को मंसिर १७ र १८ गते, प्रदेश न. २ को मंसिर २० गते, वाग्मती प्रदेशको मंसिर १७ र १८ गते, गण्डकी प्रदेशको मंसिर २४ र २५ गते, लुम्बिनी प्रदेशको मंसिर १७ र १८ गते, कर्णाली प्रदेशको मंसिर २४ र २५ गते र सुदुरपश्चिम प्रदेशको पुष ३ र ४ गते ।
३. बैठकले प्रदेश इन्चार्जसम्बन्धी निम्न निर्णय गरेको छ –
प्रदेश नम्बर १ : नवीन पाण्डे, प्रदेश नम्बर २ : चोपबहादुर वि.क., वाग्मती प्रदेश: गणेश अधिकारी, गण्डकी प्रदेश : प्रतिभा आचार्य, लुम्बिनी प्रदेश: सुवाश जि.सि., कर्णाली प्रदेश : हरी बुढा र सुदुरपश्चिम प्रदेश: हेमराज भट्ट । त्यसको साथै विभिन्न जिल्लाका इन्चार्जसम्बन्धी निर्णय भएको छ ।

४. संगठनका विभिन्न केन्द्रीय विभागहरु गठन गरिएको छ । जो यस प्रकार रहेका छन् – प्रशिक्षण विभाग प्रमुख: देवेन्द्र कुँवर, संगठन विभाग प्रमुख : सुवाश जि.सि., प्रकाशन विभाग प्रमुख: गणेश अधिकारी, अनुशासन विभाग प्रमुख : नवीन पाण्डे, आर्थिक विभाग प्रमुख : प्रतिभा आचार्य, सांस्कृतिक विभाग प्रमुख : खगेन्द्रा विष्ट , प्राविधिक विभाग प्रमुख : सुदीप पौडेल, महिला विभाग प्रमुख : विमला सापकोटा रहनुभएको छ ।

५. संगठनका विधान र सदस्यता प्रकाशन गर्ने, संगठनको वेबसाइटलाई व्यवस्थित गर्नुका साथै आर्थिक प्रणालीलाई डिजिटलाइज गर्ने निर्णय गरिएको छ ।

६. पेट्रोलियम पदार्थमा गरिएको मूल्य वृद्धि तत्काल फिर्ता लिन जोडदार माग गर्दै मूल्य वृद्धि फिर्ता विरूद्वको आन्दोलन थप सशक्त बनाउनु पर्ने आवश्यकता छ । साथै देशमा महंगी र भ्रष्टाचार बढिरहेको अवस्था छ त्यसमा तुरुन्त नियन्त्रण गर्नुपर्छ । एमसिसी सम्झौता राष्ट्रहित विपरित छ र त्यसको पुर्णरुपमा खारेजी हुनुपर्दछ । संघीयता र त्यसको प्रादेशिक संरचनाले देशलाई झन् पछि झन् आर्थिक संकट थोपरिरहेको छ । संघीयताको खारेजी अबको प्रमुख आवश्यकता भएको छ ।

दुई दुई पटक संसदको विघटन गरेर देशलाई प्रतिगमन तिर धकेल्ने केपि ओली सरकारको प्रयत्नलाई सर्वोच्च अदालतले रोकिदिएको छ । यद्यपि प्रतिगमनका सम्भावनाहरु अझै टरेका छैनन् । गणतन्त्र र धर्मनिरपेक्षताको रक्षाको प्रश्न अझ गम्भीर बनेको छ । यी विषयहरुका साथै शिक्षा क्षेत्रमा भैइरहेका बेथिति, भ्रष्टाचार, निजीकरण र माफियाकरका विरुद्धमा समेत एकल तथा संयुक्त संघर्षलाई जोड दिने वैठकले निर्णय गरेको छ ।