रिसव आचार्य, तौलिहवा ।
कपिलवस्तुका चार क्रियाशील सङ्गठनले छ बुँदे मागसहित सिद्धार्थ क्याम्पसलाई ज्ञापनपत्र बुझाएका छन् ।
२०७८ कात्तिक ७ क्याम्पस प्रमुख खेमराज शर्मासमक्ष चार विद्यार्थी सङ्गठनले एकहप्ते अल्टिमेटम दिएर छ बुँदे ज्ञापनपत्र बुझाएका हुन् ।
अनेरास्ववियु (क्रान्तिकारी), अनेरास्ववियु, अखिल (क्रान्तिकारी), अखिल (छैठौं) का जिल्लाध्यक्षद्वारा हस्ताक्षरित ज्ञापनपत्रमा कोरोना अविधिभर अनलाइनको बहानामा अनावश्यक रूपमा लिने गरेको चर्को शुल्क तत्काल फिर्ता, क्याम्पसबाट प्रशासनले प्राध्यापक, उपप्राध्यापक नियुक्ति तथा स्थायी गर्दा योग्यता, क्षमताका आधारमा नभई दलगत आधारमा नियुक्त गर्दै आएको लगायतका एजेन्डा रहेका छन् ।
क्याम्पसबाट पाउने छात्रवृत्ति गरिब, जेहन्दार, घाइते अपाङ्गलाई वितरण नगरी आफ्नो अनुकूलतामा वितरण गरिएको पनि ज्ञापनपत्रमा जनाइएको छ ।
भर्ना, मासिक शुल्कलगायत विभिन्न बहानामा गरिँदै आएको चर्को असुली कार्य तत्काल अन्त्यको माग पनि ज्ञापनपत्रमार्फत गरिएको छ ।
प्रस्तुत ज्ञापनपत्र क्याम्पसका विद्यार्थीसमक्ष राखेर क्याम्पस प्रमुखलाई बुझाएको भन्दै एक हप्ताभित्र मागको सुनुवाइ नभए चरणबद्ध आन्दोलन गर्न बाध्य हुने अनेरास्ववियु कपिलवस्तुका अध्यक्ष दीपक अनुरागीले जानकारी दिनुभयो ।
विद्यार्थीका माग समयसापेक्ष भएकाले तत्काल सुनुवाइ गर्न क्याम्पस प्रशासनसमक्ष अनेरास्ववियु (क्रान्तिकारी) का अध्यक्ष हरिशचन्द्र खनालले बताउनुभयो ।
ज्ञापनपत्र बुझाउन अनेरास्ववियु (क्रान्तिकारी) का अध्यक्ष हरिशचन्द्र खनाल, अनेरास्ववियुका अध्यक्ष दीपक अनुरागी, अखिल (क्रान्तिकारी) का अध्यक्ष विज्ञान क्षेत्री, अखिल (छैठौं) का अध्यक्ष सन्जिला बुढामगर, अनेरास्ववियु (क्रान्तिकारी) का जिल्ला सचिव पुष्कर भुसाल, अनेरास्ववियुका जिल्ला कोषाध्यक्ष कमल बेल्बासेलगायतको टोली सिद्धार्थ क्याम्पस पुगेको थियो ।
