काठमाडौं । अखिल नेपाल किसान महासंघ (अप्पा) सहित चार किसान संगठन बाढीपहिरो तथा डुबानबाट किसानहरुले ठूलो नोक्सानी ब्यहोर्नुपरेको भन्दै तत्काल राहत र क्षतिपुर्ति दिन माग गरेका छन् ।

बिहीबार संयुक्त विज्ञप्ति प्रकाशित गरी चार किसान संगठनले किसानको ‘सुरक्षित बर्तमान तथा सुनिश्चित भविष्य’ का लागि अल्पकालिन र दीर्घकालिन नीति बनाउन सरकारसँग माग गरेका छन् ।

अखिल नेपाल किसान महासंघ (अप्फा) का अध्यक्ष भैरबराज रेग्मी, अखिल नेपाल किसान महासंघ (क्रान्तिकारी) का अध्यक्ष सीताराम तामाङ, अखिल नेपाल किसान यूनियनका अध्यक्ष लोकनारायण सुबेदी र अखिल नेपाल प्रगतिशील किसान संघका इन्चार्ज कृष्ण रानाद्वारा संयुक्तरुपमा हस्ताक्षरित विज्ञप्तिमा किसानहरुले उठाउनुपरेको नोक्सानी राष्ट्रकै नोक्सानी भएको उल्लेख गरिएको छ ।

यस्तो छ चार किसान संगठनको विज्ञप्ति
नाफा केन्द्रित प्रकृति बिरोधी साम्राज्यवादी विकास मोडेलका कारण उत्पन्न भएको जलवायु परिवर्तनले गर्दा बेमौसमी वर्षा, भीषण गर्मी, भयंकर आँधी र मरुभूमिकरणले आज विश्व नै त्राहीमाम हुँदै जान थालेको छ । यस प्रकार प्रकृतिको जथाभावी निर्मम दोहनले गर्दा आज बाढी, पहिरो, डुवान, कटान र अपूर्व रोगब्याधी आदिले नेपालमा पनि नराम्रोसँग जन धनको क्षति हुँदै आएको छ ।

यसै प्ररिप्रेक्षमा अहिले बितेको ३-४ दिनदेखिको नेपालब्यापी अविरल बेमौसमी भीषण वर्षा र त्यसले उत्पन्न गरेको बाढी, पहिरो, डुबान र कटानले गर्दा देशमा ठूलो धन जनको क्षति भएको छ । बाटो र पुल पुलेसा भत्किएर आवात जावत बन्द भएको छ । यसबाट सबैभन्दा बढी क्षति नेपाली किसानको भएको छ । वास्तवमा यो राष्ट्रकै ठूलो नोक्सानी हो ।

कोरोना महामारीले थला परेको किसान थप यस प्राकृतिक प्रकोपले यो हाम्रो देशको जीवनदायिनी शक्तिको जुन क्षति भएको छ, खासगरी हाम्रो प्रमुख खाद्यान्न बाली धानको, त्यसप्रति हामी चार किसान संगठन अत्यन्तै चिन्तित र दुःखी छौं । बिपत्ति र क्षतिको यस घडीमा हामी राज्यले जन धनको क्षति भएका किसान परिबारको उद्धार, राहत, सुरक्षा तथा सम्पूर्ण किसान परिबारको सुनिश्चित भबिष्यका लागि युद्धस्तरमा प्रभावकारी कदम चालोस् र किसानको सुरक्षित बर्तमान तथा सुनिश्चित भविष्यका लागि तत्कालीन र दीर्घकालीन अग्रगामी र उन्नत नीति र कार्यक्रमको घोषणा गर्दै भूमि, कृषि र किसानका समस्या गरोस् भन्ने जोडदार माग गर्दछौं ।

यसरी मात्र खाद्य संप्रभूता, पोषणको रक्षा र वास्तवमा देशको पनि रक्षा हुन सक्तछ भन्ने कुरा हामी प्रष्ट पार्न चाहन्छौं । साथै यस दुःखद घडीमा हामी चार किसान संगठनमा आबद्ध किसान नेता तथा कार्यकर्ताहरुलाई पनि एक जुट भएर प्राकृतिक बिपत्तिमा परेका किसानहरुलाई आ–आफ्नो ठाउबाट उद्धार, सहयोग तथा सहानुभूति जे गर्न सकिन्छ तदारुकताकासाथ गर्न पनि विशेष आह्वान गर्दछौं ।

भैरवराज रेग्मी, अध्यक्ष , अखिल नेपाल किसान महासंघ (अप्फा)

सीताराम तामाङ, अध्यक्ष, अखिल नेपाल किसान महासंघ (क्रान्तिकारी)

लोकनारायण सुबेदी , अध्यक्ष, अखिल नेपाल किसान यूनियन

कृष्ण राना, इञ्चार्ज, अखिल नेपाल प्रगतिशील किसान संघ

२०७८ कार्तिक ४