रोल्पाका शिक्षक दुर्गाप्रसाद रोका विरुद्ध चरित्रहत्या गरिएकोमा चौतर्फी विरोध

काठमाडौँ । रोल्पाका शिक्षक दुर्गाप्रसाद रोकाको चरित्रहत्या गरिएको चौतर्फी विरोध भएको छ ।

जनआस्था साप्ताहिकले २०७८ असोज २० गतेको अङ्कमा र एभरेस्ट मिसन डट कम अनलाइनले २०७८ असोज ८ गते शिक्षक रोकाको चरित्रहत्या हुने गरी पीतपत्रकारिता गरिएपछि सर्वत्र विरोध भएको हो ।

जनआस्था साप्ताहिकले असोज २० गतेको अङ्कमा “गुरु रक्सी खाएरै पढाउँछन् खुरुखुरु” शीर्षकमा र एभरेस्ट मिसन डट कमले “मिझिङमा शिक्षक रोकाका कारण विद्यार्थी आजित, शिक्षकलाई राजमो जिल्लाध्यक्षको साथ” शीर्षकमा समाचार प्रकाशन गरेका थिए ।

यस सम्बन्धमा रोल्पा सुनिलस्मृति–३ मिझिङस्थित श्री चन्द्र प्रभा माध्यमिक विद्यालयका शिक्षक दुर्गाप्रसाद रोकाले २०७८ असोज २४ गते प्रेसविज्ञप्ति प्रकाशित गर्दै उक्त समाचार झुटो भएको बताउनुभएको छ । उहाँले आफ्नो चरित्रहत्या हुने गरी राजनीतिक पार्टी, विद्यालय प्रशासन र गाउँपालिकाको नामसमेत जोडेर बद्नाम गर्न खोजिएको बताउनुभएको छ ।

विज्ञप्तिमा एभरेस्ट मिसन डट कमले खिमबहादुर जिएमको “दसैँतिहार” म्युजिक भिडियोको तस्बिरसमेत राखेर आफूलाई बदनाम गर्न खोजेको पनि दावी गर्नुभयो । उहाँले यस्तो गलत समाचार नसच्याइएमा दुवै मिडियाका विरुद्ध कानुनी प्रक्रिया अगाडि बढाउने समेत जानकारी गराउनुभयो ।

उपर्युक्त क्रियाकलापको चन्द्र प्रभा विद्यालय प्रशासनले पनि प्रेसविज्ञप्ति जारी गर्दै विरोध व्यक्त गरेको छ ।

विद्यालयका प्रधानाध्यापक अभिमानसिंह घर्तीले असोज २४ गते प्रेसविज्ञप्ति जारी गर्दै गलत समाचार सच्याउन आग्रह गर्नुभएको छ ।

त्यसैगरी, असोज २८ गते सोही विद्यालयका निवर्तमान विद्यालय व्यवस्थापन समितिका अध्यक्ष प्रेमबहादुर विष्ट, नवनिर्वाचित विद्यालय व्यवस्थापन समितिका सदस्य ठगेन्द्रप्रकाश केसी र शिक्षक–अभिभावक सङ्घका अध्यक्ष वीरबहादुर रोकाको हस्ताक्षरमा जारी सो विज्ञप्तिमा यस्तो झुट कपोलकल्पित समाचार प्रकाशन गरेकोमा खेद प्रकट गर्दै सच्याउन आग्रह गरिएको छ ।

सो घटनाको विभिन्न शिक्षक सङ्गठनले पनि विरोध गरेका छन् ।

शिक्षकहरूको छाता सङ्गठन नेपाल शिक्षक महासङ्घको रोल्पा जिल्ला समितिले असोज २५ गतेका दिन प्रेसविज्ञप्ति जारी गर्दै मिडियाको यस्तो क्रियाकलापको विरोध गरेको छ । महासङ्घका जिल्लाध्यक्ष भीमप्रकाश पुनको हस्ताक्षरमा जारी विज्ञप्तिमार्फत विरोध व्यक्त गरिएको हो ।

त्यस्तै, अखिल नेपाल शिक्षक सङ्घ रोल्पाका अध्यक्ष कमलराज भट्टराईले पनि असोज २५ गते प्रेसविज्ञप्ति जारी गर्दै शिक्षकको पेसाबारे नै भ्रामक, कपोलकल्पित र तथ्यहीन समाचार प्रकाशन गरेकोमा दुवै मिडियाप्रति घोर निन्दा र खेद प्रकट गरिएको छ ।

एवम् प्रकारले नेपाल राष्ट्रिय शिक्षक परिषद् रोल्पाले पनि असोज २५ गते प्रेसविज्ञप्ति प्रकाशन गर्दै सत्य तथ्य नबुझी गैरजिम्मेवार ढङ्गले समाचार सम्प्रेषण गरेकोमा त्यसो नगर्न अनुरोध गरेको छ । परिषद्का रोल्पा जिल्ला सचिव ओमप्रकाश विष्टको हस्ताक्षरमा जारी विज्ञप्तिमा सो विरोध गरिएको हो ।

एभरेस्ट मिसन डट कमले राष्ट्रिय जनमोर्चाका जिल्लाध्यक्ष मेघनाथ विष्टको समेत शिक्षक दुर्गाप्रसादलाई साथ रहेको समाचारमा उल्लेख गरेपछि उहाँले पनि असोज २५ गते नै प्रेसविज्ञप्ति जारी गरी यस्तो प्रयासलाई राष्ट्रिय जनमोर्चासमेतको चरित्रहत्या गर्ने कोसिस बताउनुभएको छ ।

यता, एभरेस्ट मिसन डट कममा राखिएको फोटोको सम्बन्धमा खिमबहादुर घर्तीले असोज २६ गतेका दिन प्रेसविज्ञप्ति जारी गर्दै स्पष्टीकरण दिनुभएको छ । उहाँले उक्त समाचार झुटा र कपोलकल्पित भएको पनि बताउनुभएको छ ।

“उक्त समाचारमा छपाइएको तस्बिरको एक दृष्य मैले निर्माण गरेको म्युजिक भिडियो दशैँतिहारको गीतको दृष्य भएको र त्यस भिडियोमा निज शिक्षक दुर्गाप्रसाद रोका र मलगायत धेरै सहकर्मी साथीहरूले अभिनय गरी निर्माण गरेको” उहाँले विज्ञप्तिमा भन्नुभएको छ– “उक्त भिडियो खिमबहादुर जिएम, टीका सुवेदी र नारायण दहित नामको युट्युब च्यानमा हेर्न सकिने जानकारी गराउँछु ।”