काठमाडौँ । काठमाडौँ महानगरपालिकाले दसैँलगायतका चाडपर्वलक्षित कोभिड विरुद्धको खोप कार्यक्रम सुरु गरेको छ ।
काठमाडौँ महानगरपालिका स्वास्थ्य विभागका विभागीय प्रमुख हरि कुँवरले दसैँलगायतका चाडपर्वलाई लक्षित गरेर १८ वर्षमाथिका सबै उमेर समूहका नागरिकहरूलाई कोभिड–१९ विरुद्धको भेरोसेल खोप लगाउने कार्यक्रम २०७८ असोज २२ गतेबाट सुरु गरिएको जानकारी गराउनुभएको हो ।
तीन दिनसम्म चल्ने यो खोप महानगरपालिकाअन्तर्गतको ३२ ओटा वडाको ३४ स्थानबाट लगाउन पाउने व्यवस्था गरिएको छ ।
चाडपर्वका कारण भिडभाड हुने र कोभिड–१९ को पनि जोखिम बढने भएकाले त्यसैलाई मध्यनजर राखेर सो खोप कार्यक्रम सञ्चालनमा ल्याइएको काठमाडौँ महानगरपालिकाले जनाएको छ । महानगरपालिकाका स्वास्थ्य विभागका विभागीय प्रमुख कुँवरले तत्कालका लागि ७० हजार खोप जिल्ला जनश्वास्थ्य कार्यालयबाट व्यवस्था गरिएको र त्यसले नपुगे थप खोपको व्यवस्था पनि हुने बताउनुभयो ।
उहाँले भन्नु भयो– ‘काठमाडौँ महानगरपालिकाभित्र असोज २२ गतेदेखि ३ दिनसम्म चाडपर्वलाई लक्षित गरेर मानिसरूको भिडभाड हुने, अनि सार्वजनिक यातायात आवतजावत गर्दा पनि भिडभाड हुने भएकाले त्यस्ता गतिविधिलाई समेत न्यूनीकरण गर्ने उद्देश्यले पनि यो खोपलाई प्रायोरिटी दिइएको हो । चाडपर्वलाई लक्षित यो खोप कार्यक्रम काठमाडौँ महानगरपालिकाभित्रका ३२ वटै वडाको ३४ ओटा खोप केन्द्रबाट आज, भोलि र पर्सी तीन दिन पहिलो चरणको भेरोसेल खोप लगाउने कार्यक्रम रहेको छ ।‘
काठमाडौँ महानगरपालिकाले बिरामी नागरिकलाई भने लाइन नबसी सो खोप लगाउने व्यवस्था मिलाइएको जानकारी गराएको छ । स्वास्थ्य विभागका विभागीय प्रमुख कुँवरले बिरामीका लागि लाईन नबसी सो खोप लगाउने व्यवस्था मिलाइएको बताउनुभयो । उहाँले पहिलो चरणको यो भेरोसेल खोप लगाउनेलाई दसैँतिहारको बिचमा दोस्रो चरणको खोप लगाउने पाउने व्यवस्था मिलाउने जानकारी समेत दिनुभयो ।
काठमाडौँ महानगरपालिकाले स्वास्थ्य मापदण्डको पूर्ण पालना गर्दै खोप लगाउने कार्यमा सहभागी हुन पनि सबैलाई आह्वान गरेको छ । परिचय पत्र नखुलेका नागरिकले वडा कार्यालयको सिफारिसमा सो खोप लगाउने पाउने व्यवस्था पनि गरिएको स्वास्थ्य विभागका विभागीय प्रमुख कुँवरले बताउनुभयो ।
