धनगढी । राष्ट्रिय जनमोर्चाका अध्यक्ष चित्रबहादुर केसीले विदेशी शक्तिसामु लम्पसार परेको भन्दै सरकारको चर्को आलोचना गर्नुभएको छ ।
बुधबार राष्ट्रिय जनमोर्चा सुदूरपश्चिम प्रदेश समितिले धनगढीमा आयोजना गरेको विरोध सभालाई सम्बोधन गर्दै अध्यक्ष केसीले भारतीय र अमेरिकी साम्राज्यवादले विभिन्न बहानामा नेपालमाथि हस्तक्षेप गर्दासमेत सरकार मुकदर्शक बनेको आरोप लगाउनुभयो ।
‘हाम्रो भूमिमा अरु देशले हेलिकप्टर उडाएर जान्छ तर शासक मुकदर्शक भएर बसेको हुन्छ’ केसीले भन्नुभयो, ‘भारतीय सुरक्षाकर्मीले दार्चुला का जयसिंह धामी चढेको तुइन काटे हाम्रो सरकारले केही गर्न सकेन । कालापानीमा नेपालले जनगणा नगर्ने रे । त्यहाँका जनता सयौं पटक अपमान सहेर बसेका छन् । हाम्रो सरकार केही गर्न सकेको छैन ।’
अध्यक्ष केसीले संघीयताले नेपाली जनताको टाउकोमा बोझ थुपारेको बताउनु भयो । उहाँले ७ वटा प्रदेश र २५ सय जनप्रतिनिधिलाई पाल्नुपर्ने अवस्थाका कारण त्यसको बोझ नेपाली जनताले उठाउनु परेको बताउनुभयो ।
‘ऋण काडेर घ्यु पिउने हो ? ऋण काडेर कलकारखाना खोल्नु हो । नेपाली जनताको सेवा सुविधाको लागि हो । नकी मन्त्री सांसदहरुलाई गाडी किन्नलाई’ केसीले भन्नुभयो ।
उहाँले सरकारले देशमै रोजगारीको व्यवस्था गर्न नसक्दा लाखौं युवा विदेशिन बाध्य भएको बताउनुभयो । घरमा बुढा बा आमालाई छोडेर विदेशिन बाध्य कैयौं छोराछोरी बाकसमा फर्कनुपर्ने विडम्बना रहेको केसीले बताउनुभयो ।
‘संघीयताले गर्दा नेपाली जनतालाई करको बोझ थुपारी दिएको छ । भष्ट्रचार, बेरोजगारी बढाएको छ । त्यसले गर्दा ६०–७० लाख नेपाली विदेशीन बाध्य भएका छन्’ उहाँले भन्नुभयो, ‘दसैँको बेलामा पैसा आउँछ कि भनेर आमा बुवा कुरेर बसेका हुन्छन् तर बाकसमा छोरा छोरीको लास आउँछ । यस्तो विडम्बना छ हाम्रो देशको।’
उहाँले नेपालको सार्वभौमिकताविरुद्ध रहेको एमसीसी कुनै हालतमा संसदबाट पास हुन नहुने बताउनुभयो । बुधबार राष्ट्रिय जनमोर्चाले एमसीसी र संघीयताको खारेजी, महंगी, भ्रष्टाचार लगायतका विषयमा सातवटै प्रदेशमा विरोध सभाको आयोजना गरेको हो ।
धनगढी पार्कमोडमा भएको विरोध सभाअघि चौराहबाट निस्केको जुलुशले विभिन्न नारासहित नगर परिक्रमा गरेको थियो । कार्यक्रममा राजमो महासचिव मनोज भट्ट, सुदूरपञ्चिम प्रदेश अध्यक्ष नन्दराज भट्टलगायतका नेताहरुले सम्बोधन गर्नुभएको थियो ।
