खिमराज चालिसे, चण्डीगढ ।
भारतको पन्जाब राज्यको जिल्ला पटयालास्थित नाभापिन्ड, सालुवालमा परिवारसहित बस्दै आएका दीपक सापकोटाकी २४ वर्षीया श्रीमती दुर्गा सापकोटा गत सेप्टेम्बर १७, २०२१ का दिन निधन भएको सो मृत्यु शङ्कास्पद भन्दै परिवारले मूल प्रवाह अखिल भारत नेपाली एकता समाजसित निस्पक्ष छानबिनको आग्रग गरेको छ ।
पेट दुखेको सामान्य उपचारका लागि नाभा सरकारी अस्पतालमा पुग्दा निधन भएपछि माइती पक्षले मृत्यु असामान्य भएको आरोप लगाउदै मूल प्रवाहको संगरुर नगर समितिसित छानबिनको आग्रह गरेको हो ।
पीडित पक्षको निवेदन प्राप्त भएपछि केन्द्रीय परिषद् सदस्य बुद्धिराम आचार्य, नगर अध्यक्ष खेमराज पोख्रेल, नगर सदस्य रामप्रसाद खनाल, महिला क्षेत्रीय सदस्य लक्ष्मी पाण्डे, नगर सदस्य मञ्जु शर्मालगायतको टिमले तीन दिनसम्मको अथक मिहिनेतपछि कानुनी प्रकृया मिलाएर मृतक दुर्गाको पोस्टमार्टम गराउने तथा चौकीमा प्राथमिक रिपोटै दर्ता गर्ने र आफूहरूकै उपस्थितिमा दाहसंस्कार गर्ने काम सम्पन्न गरिसकेको छ ।
पोस्टमार्टमको रिपोर्ट आएपछि घटनाको सम्बन्धमा जाँचबुझ अगाडि बढाउने नगर अध्यक्ष खेमराज पोख्रेलले बताउनुभयो ।
मृतक दुर्गा सापकोटा बर्दिया जिल्ला गुलरिया गाउँपालिका निवासी हुनुहुन्छ ।
