काठमाडौं । पूर्वमन्त्री हृदयेश त्रिपाठीले सत्ता समीकरण बदलिन सक्ने संकेत गर्नुभएको छ । एमसीसी विवादका कारण अब नेपाली कांग्रेस र नेकपा एमालेको समीकरण बन्न सक्ने राजनीतिक परिस्थिति बन्दै गएको त्रिपाठीको दाबी छ ।
एक अन्तर्वार्ताका क्रममा त्रिपाठीले भन्नुभएको छ, ‘एमसीसीकै विषयमा पनि गठबन्धन दलहरुबीच दरार आएको छ । यस्तै हुने हो भने एमाले र कांग्रेसको सरकार बनाएर चुनावमा जाने स्थिति बन्न सक्छ । यो खिचडीका पछाडि अल्कपनीय परिघटना हुन सक्छ ।’
उहाँले एमसीसीका कारण नेताहरुको विश्वसनीयतामा प्रश्न उठेको बताउनुभयो । एमसीसी सम्झौता गर्नुभन्दा अगाडि १० पटक सोच्नुपर्ने भन्दै त्रिपाठीले सम्झौता गरेपछि अनुमोदन गर्नुको विकल्प नभएको जिकीर गर्नुभयो ।
नेता त्रिपाठीले प्रधानमन्त्री देउवाको प्रचण्ड र माधवसँगको सम्बन्ध लामो समय नरहने दाबी गर्नुभयो । उहाँले मन्त्रिमण्डल विस्तार गर्दा फेरि पार्टीहरु फुट्नसक्ने जोखिम रहेको बताउनुभयो । त्यसले गर्दा सरकार विस्तार हुन नसकेको उहाँको भनाई छ ।
‘अहिले हेर्नुस्, गठबन्धन दलहरुको मनस्थिति गएगुज्रेको छ । मन्त्रीको नाम दियो, पार्टी फुट्छ । सांसदहरुलाई मन्त्री दिने भनेर तानेका छन् ।कांग्रेस महाधिवेशनसम्म मात्र चुनावमा नजान खोजेको हो । ऊ लामो समय सरकार चलाउन चाहँदैन । लामो समय सरकार चलाए अलोकप्रिय होइन्छ भन्ने उसलाई थाहा छ’ उहाँले भन्नुभयो, ‘देउवा चुनावमा जान चाहँदा प्रचण्ड, माधव नेपालहरु त्यसमा सहमत हुँदैनन् । त्यसैले अहिलेको समीकरण बदलिन सक्छ ।’
नेता त्रिपाठीले देशको राजनीति यसरी नै लिकबाहिर जाने हो भने ठूलो संवैधानिक दुर्घटना हुन सक्न सक्ने पनि औंल्याउनुभयो । यो अवस्थाले संविधान नै असफल हुनसक्ने त्रिपाठीको भनाई छ ।
यस्तै, उहाँले भारतसँगको सम्बन्धमा त्यति धेरै उतारचढाव पनि नआएको र धेरै सुदृढ पनि नभएको विश्लेषण गर्नुभयो । चीनसँग सम्बन्धलाई अनावश्यक उछालिएको उहाँको दाबी छ ।
‘नेपालका दलहरुको दुःखद पक्ष के हो भने सीमा विवाद र अन्तर्राष्ट्रिय सम्बन्धलाई आन्तरिक राजनीतिक विषयवस्तु बनाउँछन् । अरु देशमा दलहरुले अन्तर्राष्ट्रिय सम्बन्धमा एउटै धारणा राख्छन्’ त्रिपाठीले भन्नुभयो, ‘ नेपालमा त्यस्ता धारणा पहिले पनि भएन, अहिले पनि भएको छैन । दलहरुले मौसमी नारा चलाउनु विडम्बना हो । हरेक मौसमले सदैव उत्तिकै साथ दिन सक्दैन ।’
