लन्डन । बेलायतस्थिति भूपू गोर्खाको समान पेन्सनलगायत माग सम्बोधनका लागि बेलायत सरकारको सक्रियतामा बुधबार प्रारम्भिक बैठक सम्पन्न भएको छ ।
लन्डनस्थित नेपाली दूतावासमा बेलायतका रक्षामन्त्री बेन वालेस र रक्षा राज्यमन्त्री लियो डोचेर्टी, बेलायतका लागि नेपाली राजदूत लोकदर्शन रेग्मी र भूपू ब्रिटिस गोर्खा सङ्गठनबिचको बैठक सम्पन्न भएको हो ।
बैठकमा भूपू गोर्खाको माग सम्बोधनका लागि विगतमा भएको सहमतिअनुरूप भूपू गोर्खाका प्रतिनिधि सम्मिलित नेपाल सरकार र बेलायत सरकारबिच डिसेम्बर महिनादेखि सुरु हुने वार्ताको लागि समिति गठन, वार्ता समितिका सर्त एवम् अन्य आवश्यक तयारीका विषयमा छलफल भएको नेपाली दूतावासले जनाएको छ ।
बैठकमा भूपू गोर्खा सङ्गठनका तर्फबाट गोर्खा सत्याग्रह संयुक्त सङ्घर्ष समितिका प्रमुख संयोजक कृष्णबहादुर राई, गेसोका सभापति कृष्णकुमार राई, बी.जी.डब्लू.एस. का अध्यक्ष टिकेन्द्रदल देवान, नेसाका अध्यक्ष केशबहादुर गुरूङ, गोर्खा पेन्सन इन्जस्टिक गु्रपका अध्यक्ष उदयबहादुर गुरूङ, युबिजीनका अध्यक्ष राम राई, आमरण अनशनमा बस्नुभएका गोर्खा सत्याग्रहका तीन जना प्रतिनिधि ज्ञानराज राई, पुष्पा राणा घले र धनबहादुर गुरुङ, गोर्खा सत्याग्रहका प्रवक्ता जुद्धबहादुर गुरुङ एवम् राजदूतावासका उपनियोग प्रमुख रोशन खनाल तथा सैनिक सहचारी रत्नबहादुर गोदारको उपस्थिति थियो ।
गत महिना गोर्खा सत्याग्रह सङ्घर्ष समितिको पहलमा भएको आमरण अनसन तोड्दा बेलायत सरकारले गोर्खाको मागका सम्बन्धमा नेपाल सरकार र गोर्खासमेत सँग वार्ता गर्ने प्रतिबद्धता गरेको थियो । डिसेम्बर महिनाभित्रै दुई देशबिचको वार्ता गर्ने र त्यसको तयारीस्वरूप सेप्टेम्बर ८ मा पहिलो बैठक गर्ने सहमति त्यतिबेलै गरिएको थियो । सोही वाचाअनुरूप बुधबारको बैठक सम्पन्न भएको दूतावासले जनाएको छ ।
