धनगढी । राष्ट्रिय जनमोर्चाका केन्द्रीय सदस्य एवम् सुदूरपश्चिम प्रदेश अध्यक्ष नन्दराज भट्टले राजमोको आन्तरिक मामिलामा चलखेल नगर्न अन्य राजनीतिक दलहरुलाई सुझाव दिनुभएको छ ।

एमसीसीलगायत राष्ट्रियताका विभिन्न मुद्दामा पार्टीसँग सहकार्य गरेका कतिपय दलहरुले सुदूरपश्चिममा पार्टीबाटै निष्काशित व्यक्तिहरुसँग साँठगाँठ गरेको उहाँले आरोप लगाउनुभएको छ ।

सुदूरपश्चिमका केही दलले राष्ट्रिय जनमोर्चाबाट निष्काशित व्यक्तिहरुसँग संयुक्त बैठक बसी आज (भदौ २३ गते) एमसीसीविरुद्ध संयुक्त कार्यक्रम भन्दै पार्टीबाट निष्काशित व्यक्तिलाई प्रदेश अध्यक्ष भनी संयुक्त वक्तव्य निकालेकोप्रति उहाँले आपत्ति जनाउनुभएको छ । दलहरुको यस्तो कार्यले सहकार्य बलियो नहुने पनि उहाँले बताउनुभएको छ ।

वक्तव्यमा भनिएको छ,
‘एमसीसीका विरुद्ध भाद्र २३ गते कैलालीको अतरियामा विरोध कार्यक्रम गर्ने उद्देश्यले हाम्रो पार्टीको नाम सहित सामेल गरि विप्लप, वैद्य माओवादी र नेकपा (माले) ले भाद्र २२ गते जारि गरेको संयुक्त वक्तव्य प्रति हाम्रो गम्भीर ध्यानाकर्षण भएको छ । सर्वप्रथम हाम्रो पार्टीको नाम सामेल गरी वक्तव्य जारी गर्दा वा विरोध कार्यक्रमको आह्वान गर्दा हामीसँग कुनै पनि स्तरमा बैठक बसि सरसल्लाह, सहमति भएको थिएन । हामीसँग कुनै पनि प्रकारको सरसल्लाह वा सहमति नगरी हाम्रो पार्टीको नाम सहित जोडेर जारी गरेको वक्तव्य अनधिकृत छ । हामीसँग कुनै पनि प्रकारको सरसल्लाह सहमति नगरी हाम्रो पार्टीको नाम वक्तव्यमा सामेल गर्ने अधिकार विप्लप सहितका अन्य समूहलाई कहाँबाट प्राप्त भयो ?

अझ त्यसमा पनि गम्भीर विषय हाम्रो पार्टीले सार्वजनिक रुपमै अनुशासनको कारबाही गरी निष्काशन गरेका व्यक्तिले प्रदेश अध्यक्षको रूपमा वक्तव्यमा हस्ताक्षर गरेका छन् । सार्वजनिक रुपमा कारबाही भइ दलबाट निष्काशित व्यक्तिलाई पार्टीको प्रदेश अध्यक्षका रूपमा स्वीकार गर्ने कार्य समेत घोर आपतिजनक छ । कुनै पनि प्रकारको सहकार्य गर्दा केन्द्रीय स्तरमा सामेल पक्षले प्रदेश वा स्थानीय स्तरमा सम्बन्धित पार्टीको आधिकारिक व्यक्ति वा समितिसँग नै सम्पर्क वा छलफल गरेर संयुक्त कार्यक्रम तय गर्नु पर्दछ । तर वक्तव्यमा हस्ताक्षर गरेका पक्षहरुले त्यो नगरी हाम्रो पार्टीबाट निष्कासित व्यक्तिहरुले गठन गरेको अवैध समितिसँग सम्बन्ध कायम गरि हाम्रो पार्टीको आन्तरिक मामिलामा खेल्न खोज्ने कार्य भएको छ । यो कार्यले सहकार्य वा कार्यगत एकतालाई बलियो बनाउन सक्दैन ।

केन्द्रीय स्तरमा हाम्रो पार्टीसँग सहकार्य गर्ने तर प्रदेश वा स्थानीय स्तरमा हामीले अनुशासनको कारबाही गरेका व्यक्तिलाई हाम्रो पार्टीको नामबाट बैठकमा वा कार्यक्रममा सामेल गर्ने कार्य गलत हुन्छ । त्यस्तो कार्यले आन्दोलनमा फुट पार्ने वा कमजोर बनाउने काम हुन्छ । हामीसँग कुनै सरसल्लाह नगरी हाम्रो पार्टीको नाम दुरपयोग गरि आह्वान गरेकोएमसीसी विरुद्धको आजको कार्यक्रममा हाम्रो सहभागिता हुने छैन । यद्यपी एमसीसीका विरुद्ध हामी दृढ छौँ । हामीले एकल तथा संयुक्त रुपमा एमसीसीका विरुद्ध संघर्ष गर्दै आएका छौँ । आगामी दिनहरुमा पनि हाम्रो त्यो नीति कायमै हुनेछ ।

धन्यवाद
नन्द राज भट्ट
अध्यक्ष, राष्ट्रिय जनमोर्चा सुदूरपश्चिम प्रदेश समिति