जगतबहादुर विक, क्वालालम्पुर ।
लामो समयदेखि विश्वव्यापी रूपमा फैलिएको कोरोना महामारीको कारण मानव जीवनलाई प्रत्यक्ष रूपमा ठुलो असर परिरहेको छ भने आफ्नो घरपरिवारको विभिन्न आवश्यकता परिपूर्ति गर्नका लागि आफ्नो देश छोडी वैदेशिक रोजगारीका लागि बिदेसिएका नेपालीमा पनि यसको ठुलो असर परिरहेको छ ।
उनीहरू एकातिर रोगको चपेटामा परेका छन भने अर्कोतिर, ३५–४० डिग्रीको गर्मी सहेर कम्पनी र साहुको दबाब सहेर दिनरात आफ्नो बाध्यता र विवशतासँग जुध्नुपरेको छ ।
यही कोरोना महामारीको समयमै मलेसियामा रही काम गर्ने नेपालीको पीडा गम्भीर समस्याको रूपमा भई खडा भएको छ । लामो समयदेखि मलेसियामा बढ्दो क्रममा रहेको कोरोना महामारीले मलेसिया नेपाली एकता समाजका महासचिव प्रेम शर्मा, उपाध्यक्ष जगत् विक, कोषाध्यक्ष प्रेमकुमारी विक, सदस्य कमल खड्कालगायत साथीहरू लामो समयसम्म कोरोनाबाट सङ्क्रमित भई त्यसलाई जित्न सफल हुनुभएको छ ।
त्यस्तै, मलेसियामा रहेका नेपाली कामदारलाई पनि ठुलो असर परेको छ । बढ्दो महामारीका कारणले अधिकांश कम्पनी बन्द भएका छन भने पटक–पटक कोरोना पोजेटिभ देखिँदा स्वास्थ्य समस्या पनि झेल्नुपरेको छ ।
मलेसियामा अवस्थित रहेको मलेसिया नेपाली एकता समाजले एकता समाजमा आबद्ध सदस्य र साथीहरूको सम्पर्कमा आउनुभएका मलेसियामा रहेका नेपाली दाजुभाइ, दिदिबहिनीहरूको समस्यामा सहयोग गर्ने, सहानुभूति दिलाउने र अप्ठ्यारोमा परेकालाई सहजीकरण गर्ने काम पनि गरिरहेको छ ।
पटक–पटक को लकडाउनको कारणले गर्दा मलेसिया नेपाली एकता समाजका सदस्यले पनि अप्ठ्यारो परिस्थितिको सामना गर्नु परिरहेको छ ।
