काठमाडौं । बुटवलस्थित लुम्बिनी वाणिज्य क्याम्पसमा विद्यार्थीहरूले तोडफोड गरेका छन् । सत्तापक्षीय विद्यार्थी संगठनले मंगलबार बिहान क्याम्पसको प्रशासनिक भवनमा तोडफोड गरेका हुन् ।
क्याम्पस प्रमुख डा. ताराप्रसाद उपाध्यायले पुरानो भवनका लेखा र परीक्षा शाखामा विद्यार्थीहरुले तोडफोड गरेको बताउनुभयो ।विद्यार्थीहरूले कम्प्युटर र कुर्सी तोडफोड गर्नुका साथै कागजात पनि च्यातिदिएको उहाँले जानकारी दिनुभयो ।
तोडफोडपछि विद्यार्थी संगठनले संयुक्त विज्ञप्ति प्रकाशित गरी क्याम्पसमा भएको क्षतिको जिम्मेवार सञ्चालक समिति हुने जिकिर गरेका छन् । विज्ञप्तिमा एमबीएस प्रवेश परीक्षा तथा भर्ना कार्यक्रम अगाडि नबढाई ‘अटोनोमस’ तर्फका एमबीएस–एफ र एमबिए–बीएफको प्रवेश परीक्षा फारम खुलाएकाले क्याम्पस प्रशासनमा तोडफोड गरिएको जनाएका छन् ।
‘लुम्बिनी वाणिज्य क्याम्पसले त्रिभुवन विश्वविद्यालय अन्तर्गतको एमबीएस र बीबीएस हटाउने निर्णयविरुद्ध संयुक्त विद्यार्थी संगठन आन्दोलनरत थियो’ उनीहरुले भनेका छन्, तर त्यसलाई बेवास्ता गर्दै अटोनोमस अन्तर्गतका एमबीएस–एफ र एमबीए–बीएफको प्रवेश परीक्षा फारम खुलाएपछि विद्यार्थीले क्याम्पस प्रशासनमा तोडफोड गरिएको हो ।’
