काठमाडौं । जापानले नेपालको कृषि तथा सिंचाई क्षेत्रमा सहयोग गर्ने प्रतिवद्धता जनाएको छ । नेपाल भ्रमणमा रहेका जापानको कृषी, वन तथा मत्स्यपालन मन्त्रालयको विदेश मामिला हेर्ने विभागका उपमहानिर्देशक नाकाडा टाहामीले सहयोगको प्रतिवद्धता जनाएका हुन् ।
उर्जा, जलस्रोत तथा सिंचाईमन्त्री वर्षमान पुनसँग भएको भेटवार्तामा जापानी टाहामी नेतृत्वको प्रतिनिधिमण्डलले सहयोगको प्रतिवद्धता जनाएको सिंचाई मन्त्रालयले जनाएको छ । बैठकमा जापानी राजदूत मसामिची साईगो सहभागी थिए ।
बैठकमा सिंचाई र जलविद्यूत क्षेत्रमा गर्न सकिने सहकार्यका विषयमा छलफल भएको थियो ।
भेटमा उर्जामन्त्री पुनले नेपालका विभिन्न जलविद्युत आयोजनामा लगानी गर्न जापान सरकारसँग आग्रह गरे । जापान नेपालको पुरानो विकास साझेदार मुलुक भएको भन्दै आगामी दिनमा पनि दुई देशको सम्बन्ध अझै प्रगाढ हुने पनि उनले विश्वास व्यक्त गरे ।
