काठमाडौं । राष्ट्रिय क्रिकेट टोलीका पूर्वकप्तान पारस खड्काले अन्तर्राष्ट्रिय क्रिकेट बाट सन्यास लिएको घोषणा गरेका छन् । खड्का नेपाली क्रिकेटका सबैभन्दा चर्चित र सफल खेलाडीमध्येमा पर्छन् ।
१२ वर्ष राष्ट्रिय क्रिकेट टोलीको नेतृत्व गरेका खड्कालाई नेपालको सबैभन्दा सफल कप्तान मानिन्छ । उनले आईसीसी क्रिकेट लिग डिभिजन ५ बाट खेल्दै नेपाललाई एकदिवसीय अन्तर्राष्ट्रिय क्रिकेट मान्यता प्राप्त राष्ट्र बनाउन महत्त्वपूर्ण योगदान दिएका थिए।
मंगलवार बिहान सामाजिक सञ्जालमार्फत संन्यास लिने घोषणा गरे । उनले नेपाली क्रिकेटका समर्थक र सरोकारवालाप्रति कृतज्ञता पनि व्यक्त गरेका छन्।
‘अन्तर्राष्ट्रिय क्रिकेटरको रूपमा मेरो यात्रा टुङ्गिएको छ तर नेपाली क्रिकेटको लागि मेरो सपना भने अझै बामे सर्दै छन्’ उनले लेखेका छन्, ‘क्रिकेटरका रूपमा मैले आफ्नो मन, वचन र कर्मले कर्तव्यनिष्ठ भई देश र नेपाली क्रिकेट जगतको उत्थानका लागि सदैव आफ्नो भूमिका निर्वाह गरेँ।’
सन् २००४ मा युवा टोलीमा प्रवेश गरेका खड्काले त्यसपछि निरन्तर दुई दशक खेले । त्यस क्रममा उनले यू-१५, यू-१७ र यू-१९ हुँदै राष्ट्रिय टोलीसम्म पुगे।
अलराउण्डरको भूमिकामा निकै प्रभावशाली देखिएका खड्काको मुख्य विशेषता कप्तानको रूपमा गर्ने चुस्त निर्णय थियो। गत वर्ष थाइल्यान्डमा एसीसी पूर्वीय क्षेत्रको टी(२० खेल्नु उनको राष्ट्रिय जर्सीबाट अन्तिम अन्तर्राष्ट्रिय खेल हो।
खड्काको कप्तानीमा नेपालले सन् २०१४ को टी-२० विश्वकप खेल्यो जुन नेपालको सबैभन्दा ठूलो अन्तर्राष्ट्रिय सहभागिता थियो।
अनि सन् २०१८ मा नेपालले एक दिवसीय राष्ट्रको मान्यता पायो।
खड्का नेपालकोलागि एक दिवसीय र टी-२० दुबैमा पहिलो शतक प्रहार गर्ने खेलाडी हुन्। उनले १० एकदिवसीय, ३३ टी-२० अन्तर्राष्ट्रिय, दुई प्रथम श्रेणी, ४४ लिस्ट-ए र ५६ टी-२० खेल खेलेका छन्।
