काठमाडौँ । पाँच विद्यार्थी सङ्गठनले महाकाली नदी तर्दै गर्दा तुइन काट्ने भारतीय एसएसबी जवानलाई कारबाही गर्न माग गरेका छन् ।
प्रधानमन्त्री शेरबहादुर देउवालाई बालुवाटारमा २०७८ साउन १६ गते ज्ञापनपत्र बुझाउँदै उनीहरूले सो माग गरेका हुन् । ज्ञापनपत्रमा उनीहरूले यस सम्बन्धमा तत्कालै भारतीय पक्षसँग स्पष्टीकरण सोध्न पनि माग गरेका छन् ।
पाँच विद्यार्थी सङ्गठनले सीमाक्षेत्रमा नेपालीमाथि हुने भारतीय ज्यादती रोक्न माग गर्नुका साथै त्यस क्षेत्रका जनताको सहज जीवन र शान्तिसुरक्षाको ग्यारेन्टी गर्नुपर्ने आवश्यकतामा समेत जोड दिएका छन् ।
ज्ञापनपत्रमा उनीहरूले मध्यपश्चिमाञ्चल विश्वविद्यालयमा व्याप्त बेथितिका विरुद्ध संयुक्त आन्दोलन चलिरहेकोमा स्वयम् उपकुलपतिले आन्दोलनरत विद्यार्थीमाथि नै दमन गर्ने, गिरफ्तारी गर्ने र धम्क्याउने गरेकोमा जायज माग सम्बोधन गरी परीक्षा सुचारु गर्न माग गरेका छन् ।
धरानको बिपी कोइराला स्वास्थ्य विज्ञान प्रतिष्ठानमा पदाधिकारीबाटै भ्रष्टाचार, अनियमितता भएकोमा उपकुलपतिलाई बर्खास्त गरी पढाइ र बिरामीको उपचारजस्ता दैनिक काममा सहजता ल्याउन उनीहरूको माग छ ।
विश्वविद्यालयमा उपकुलपति र पदाधिकारी राजनीतिक भागबन्डाको आधारमा नियुक्ति हुँदा भ्रष्टाचार, बेथिति अनियमितता फैलिएको ठहर गर्दै पाँच विद्यार्थी सङ्गठनले त्यसको सट्टा योग्यता, क्षमता र विज्ञताको आधारमा नियुक्ति गरिनुपर्ने आवश्यकतामा जोड दिएका छन् ।
ज्ञापनपत्रमा अखिल (छैठौं) का अध्यक्ष विमल पोखरेल, नेपाल विद्यार्थी सङ्घका अध्यक्ष राजिव ढुङ्गाना, अखिल (क्रान्तिकारी) का अध्यक्ष रञ्जित तामाङ, अनेरास्ववियुका अध्यक्ष सुदेश पराजुली र समाजवादी विद्यार्थी युनियनका अध्यक्ष रूपनारायण श्रेष्ठको हस्ताक्षर रहेको छ ।
