काठमाडौं । भारतले नेपाली भूभागमाथि अतिक्रमण गरेको विरोधमा विभिन्न राजनीतिक दलसम्बद्ध किसान संगठनहरु एकजुट भएका छन् ।
अखिल नेपाल किसान महासंघ, अखिल नेपाल किसान महासंघ (क्रान्तिकारी), अखिल नेपाल किसान यूनियन, अखिल नेपाल प्रगतिशील किसान संघ र फ्याक्ट नेपाल समेतको आइतबार बसेको संयुक्त बैठकले भारतीय हस्तक्षेप विरुद्ध एकजुट भएर आवाज उठाउने निर्णय गरेको हो ।
बैठकले किसानका विभिन्न समस्याहरुबारे मागपत्र तयार पारी संयुक्त आन्दोलन गर्ने निर्णयसमेत गरेको छ ।
संयुक्त बैठकले गरेका दुई बुँदे निर्णय यस्ता छन् ।
१) नेपालको सार्वभौमिकता र क्षेत्रीय अखण्डतामाथि नाङ्गो हस्तक्षेप गर्दै नेपालको कालापानी क्षेत्र, लिम्पियाधुरा र लिपुलेकलाई भारतीय नक्सामा समावेश गरिएकोमा यो भारतीय बिस्तारबादी हस्तक्षेलाई घोर निन्दा र भत्र्सना गर्दछौ र यो नक्सालाई खारेज गरी कालापानी क्षेत्रबाट भारतीय सेना हटाउन जोडदार माग गर्दछौं ।
हामी चार किसान संगठनहरु अखिल नेपाल किसान महासंघ, अखिल नेपाल किसान महासंघ (क्रान्तिकारी) अखिल नेपाल किसान यूनियन, अखिल नेपाल प्रगतिशील किसान संघ र फ्याक्ट, नेपाल समेतको आज बसेको संयुक्त बैठक नेपाल माथिको यो हस्तक्षेपका बिरुद्ध सम्पूर्ण बामपन्थी, प्रगतिशील, देशभक्त जनवादी शक्तिहरुलाई एकाबद्ध भएर संयुक्त आन्दोलनमा जुट्न आह्वान समेत गर्दछ ।
२) हामी नेपाली किसान बर्गले भोगिराखेका राष्ट्रिय र अन्तर्राष्ट्रिय महत्वका जल्दाबल्दा समस्याहरुलाई लिएर संयुक्त आन्दोलन उठाउन सहमत भएका छौं र यसका लागि आगामी बैठकमा माग पत्र तयार गरी सार्वजनिक गर्ने निर्णयमा पुगेको समेत अवगत गराउँदछौ ।
बैठकपछि अखिल नेपाल किसान महासंघका अध्यक्ष भैरवराज रेग्मी, अखिल नेपाल किसान महासंघ (क्रान्तिकारी)का अध्यक्ष सीताराम तामाङ्ग, अखिल नेपाल किसान यूनियनका अध्यक्ष लोकनारायण सुबेदी, अखिल नेपाल प्रगतिशील किसान संघका इन्चार्ज कृष्ण राना र फ्याक्ट नेपालका प्रतिनिधि गंगादेव राईको हस्ताक्षरमा संयुक्त विज्ञप्ति प्रकासित गरी निर्णय सार्वजनिक गरिएको छ ।
