काठमाडौं । नेकपा(एमाले)का वरिष्ठ नेता माधवकुमार नेपालले ‘पिपुल्स भोलेन्टियर’ घोषणा गर्नुभएको छ । हालै पार्टी अध्यक्ष केपी ओलीले युवासंघको दस्ता ‘युथफोर्स’ ब्यूँताएपछि नेपालले पिपुल्स भोलेन्टियर घोषणा गर्नुभएको हो ।
बिहीबार भक्तपुर सुर्य विनायकस्थित थापा पार्टी प्यालेसमा युवा संघ नेपालले आयोजना गरेको ४३ औँ पुष्पलाल स्मृति दिवस तथा ‘पिपुल्स भोलेन्टियर’ घोषणा कार्यक्रममा एमाले वरिष्ठ नेता नेपालले १ हजार एक सदस्यीय पिपुल्स भोलेन्टियर घोषणा गर्नुभएको हो ।
पिपुल्स भोलेन्टियरको प्रमुखमा शिव श्रेष्ठ तथा सचिवमा मनोज खत्रीलाई जिम्मेवारी दिइएको वरिष्ठ नेता नेपालले कार्यक्रममा जानकारी गराउनुभयो ।
पिपुल्स भोलेन्टियर घोषणा गर्दै उहाँले यो कम्युनिष्ट विचारबाट अघि बढ्ने बताउनुभयो । उहाँले युवाहरुलाई मानिसमा हुनुपर्ने राम्रो गुणहरु सिक्न र नराम्रो बानी त्याग पनि आग्रह गर्नुभयो । भोलेन्टियरले अरुले जे गर्छ त्यो नगर्ने पनि उहाँले स्पष्ट पार्नुभयो । आफुहरु हिम्मतिलो र परिवर्तन गर्न चाहाने युवा पंक्ति तयार गर्न चाहेको उल्लेख गर्दै युवाहरुल जनसेवा, देशभक्ति र लोकतन्त्रकाले लागि अघि बढ्न अपिल पनि गर्नुभयो ।
उहाँले भन्नुभयो – ‘यो कम्युनिष्ट विचारबाट अघि बढ्ने संगठन हुनेछ पिपुल्स भोलेन्टियर । राम्रा मानिसको गुण तपाईहरुले सिक्नुपर्छ । नराम्रो बानी नसिक्नुहोला । यो कुरामा म विशेष जोड दिन चाहान्छु । राम्रो बानि व्यहोरा भयो भने मान्छेले गौरवबोध गर्नेछन् । युवा संघले निर्माण गर्ने पिपुल्स भोलेन्टियर असल मानिसको स्वभाव बोकेको स्वयंसेवक बन्नुपर्दछ । अरुले जे गरे त्यो दोहो¥याउने होइन ।’
वरिष्ठ नेता नेपालले आफुहरुसँग सहि बिचार भएको उल्लेख गर्दै सही विचार हुनेहरु आत्तिनुपर्ने आवश्यकता नभएको बताउनुभयो । सहि बिचारको पक्षमा हजारौँ मान्छे पछि लाग्ने पनि उहाँले बताउनुभयो ।
नेपाल पक्षलाई आममाफी
एमाले अध्यक्ष ओलीले माधव नेपाल पक्षलाई आममाफी दिइने भन्दै पार्टीमा फर्किएर काम गर्न आव्हान गर्नुभएको छ । नेकपा एमालेको केन्द्रीय कमिटी बैठकलाई सम्बोधन गर्दै अध्यक्ष ओलीले पार्टी एकता जोगाउन माफी दिइएको बताउनुभयो ।
बैठकले पार्टी एकताको प्रयासलाई निरन्तरता दिने निर्णयसमेत गरेको छ । बिहीबारको केन्द्रीय कमिटी बैठकले एमाले एकताको प्रयासलाई थप निरन्तरता दिने र यसका लागि पार्टी अध्यक्षको तर्फबाट पार्टीका सबैलाई समेट्नका लागि अधिकतम प्रयास गर्ने निर्णय गरेको प्रवक्ता प्रदीप ज्ञवालीले बताउनुभयो ।
बैठकमा पार्टी अध्यक्ष केपी शर्मा ओलीले एकतालाई सुदृढ पार्नका लागि एकतामा आउन चाहानेहरुलाई विगतका गल्तीहरुलाई विगतका गल्ती बिर्सेर स्वागत गर्न सकिने बताउनुभएको पनि प्रवक्ता ज्ञवालीले जानकारी दिनुभयो ।
