नारायण न्यौपाने, काठमाडौँ ।
जापानको टोकियोमा आगामी साउन ८ देखि २४ गतेसम्म हुने ३२औँ गृष्मकालीन ओलम्पिक प्रतियोगितामा चार महिला र एक पुरुषसहित पाँच खेलाडीलाई नेपालको झन्डा फराउने अवसर प्राप्त भएको छ ।
खेलकुद क्षेत्रको विश्वकै सबैभन्दा ठुलो कुम्भ मेलाका रूपमा रहेको ओलम्पिकमा यस पटक सुुटिङ विधाकी कल्पना परियार, एथेलेटिक्समा सरस्वती चौधरी, पौडीमा गौरीका सिंह र अलेक्सजङ्ग शाह र जुुडोमा सोनिया भट्टले यस पटक नेपालको प्रतिनिधित्व गर्नुहुने छ ।
नेपालको अनुरोधमा आआफ्नो खेलविधामा पुुर्याउनुभएको योगदानका आधारमा उहाँहरू पाँचै जना वाइल्डकार्डमार्फत छनोटमा पर्नुभएको हो । छनोट हुनेमध्ये १० मिटर एयर राइफलकी अब्बल परियार र १०० मिटर एथेलेटिक्समा राष्ट्रिय कीर्तिमानधारी चौधरी नेपाली सेनाका खेलाडी हुनुहुन्छ ।
यसैबिच, सैनिक मुख्यालय जङ्गी अड्डाले ओलम्पिकका लागि छनोट भएका विभागीय टिम त्रिभुवन आर्मी क्लबका खेलाडीको सम्मानमा मङ्गलबार बधाई तथा शुुभकामना कार्यक्रम गरेको थियो । प्रधान सेनापति पूर्णचन्द्र थापाले कार्यक्रममा ती दुवै खेलाडीलाई सम्मानस्वरुप खेल सामग्रीसहितको झोला हस्तान्तरण गर्नुभएको थियो ।
नेपाल ओलम्पिक कमिटीका अध्यक्ष जीवनराम श्रेष्ठ, नेपाल खेलकुद परिषद्का सदस्य सचिव रमेश सिलवाल र नेपाली सेना सैनिक शारीरिक तालिम तथा खेलकुद केन्द्रका प्रमुख शशीकिरण रायमाझीले मन्तव्य राख्नुभएको थियो । (रासस)
