काठमाडौं । नेपालको पुरानै नक्सा राखेर पाठ्यपुस्तक प्रकाशन गर्ने प्रकाशक र प्रयोगमा ल्याउने विद्यालयलाई कारबाही सुरु गरिएको छ । पाठ्यक्रम विकास केन्द्रले नेपालको पुरानै नक्सा राखेका पाठ्यक्रम छपाई गर्ने छापाखना, वितरण गर्ने वितरक र प्रयोगमा ल्याउने विद्यालयका प्रधानाध्यापकहरुलाई कारबाही स्वरुप स्पष्टीकरण सोधेको हो ।
आइतबार सूचना प्रकाशित गरी पाठ्यक्रम विकास केन्द्रले सरकारको निर्देशन अवज्ञा गरी पुरानै नक्सा राखेर पाठ्यपुस्तक छपाई गरिएको, कतिपय विद्यालयमा सोही पाठ्यपुस्तक प्रयोगमा ल्याइएको तथा स्पष्ट मूल्य सूची नराखेरै पुस्तक विक्रि वितरण गरिएको जनाएको छ ।
अनुगमनका क्रममा नेपालको अतिक्रमित भूभाग लिपुलेक, लिम्पियाधुरा र कालापानीलगायतका क्षेत्र समेटिएको नक्सा नरहेको पुरानै पाठ्यपुस्तक प्रयोगमा ल्याइएको पाएपछि उनीहरुलाई कारबाहीका लागि स्पष्टीकरण सोधेको केन्द्रको भनाई छ । यही असार १ गते सो केन्द्रले अनिवार्य रुपमा नयाँ नक्सा समेटिएको पाठ्यपुस्तक विक्रि वितरण गर्न निर्देशन दिएको थियो।
यस्तै, पाठ्यक्रम केन्द्रका अनुसार कतिपय पाठ्यपुस्तक तथा पाठ्यसामग्रीहरुमा मूल्य उल्लेख नगरिएको वा कालो पोतेर नयाँ मूल्यसूची टाँस गरिएको पाइएको छ भने नेपाली कला संस्कृति, सामाजिक शिक्षा जस्ता पाठ्यक्रम नेपाली भाषामा हुनुपर्ने निर्देशन दिइएकोमा सोसमेत लागू नभएको पाइएको छ ।
पाठ्यक्रम विकास केन्द्रले नेपालको नयाँ नक्सा भए नभएको तथा सरकारबाट स्वीकृत पाठ्यक्रम भए नभएको हेरेर मात्र पाठ्यपुस्तक खरिद गर्न पनि अभिभावकहरुसँग आग्रह गरेको छ।
यस्तो छ सूचना
