दमास्कस । सिरियामा राष्ट्रपति पदका लागि भएको निर्वाचनबाट पुनः वर्तमान राष्ट्रपति बसर अल असद निर्वाचित हुनुभएको छ । दुई दिन अघि भएको मतदानबाट उहाँ नै पुनः राष्ट्रपति निर्वाचित हुनुभएको बताइएको छ ।
सिरियाका सभामुख हमादेन सवागले बिहिबार सो कुराको घोषणा गर्नुभएको हो । सिरियाको संसदले बिहिबार उहाँ पुनः सिरियाको राष्ट्रपतिमा निर्वाचित भएको समाचार घोषणा गरेको विभिन्न अन्तर्राष्ट्रिय सञ्चार माध्यमले जनाएका छन् ।
समाचारमा जनाइएअनुसार उहाँले यस पटकको निर्वाचनमा उहाँका प्रतिद्वन्द्वीको भन्दा निकै धेरै मत ल्याउनुभएको छ । उहाँको ९५.१ प्रतिशत मत आएको सिरियाको संसदले घोषणा गरेको छ ।
यस पटकसमेत गरी उहाँ सिरियाको राष्ट्रपतिमा चौथो पटक निर्वाचित हुनुभएको हो । उहाँको कार्यकाल सात वर्षको हुने छ । उहाँले यसअघि २०१४ मा भएको निर्वाचनमा ८८ प्रतिशत मत ल्याउनुभएकोमा यस पटक भने त्योभन्दा पनि बढी मत ल्याउनुभएको छ ।
सिरियामा अहिले पनि सुरक्षाको समस्या रहेकोले निश्चित क्षेत्रमा मात्र मतदान भएको बताएको थियो । खासगरी सिरियाको राजधानी र सरकारको नियन्न्त्रणमा रहेका क्षेत्रबोहकका क्षेत्रमा सुरक्षा व्यवस्था निकै कडा बनाइएको थियो ।
सिरियाका आन्तरिक मामिलासम्बन्धी मन्त्री मोहमद अल रहमाउनले सिरियामा बुधबार भएको मतदान शान्तिसुरक्षाको व्यवस्था मिलाइएका कारण शान्तिपूर्ण रूपमा सम्पन्न भएको जानकारी दिनुभयो ।
सिरियाका राष्ट्रपति बसर अल असदसहित यहाँका तीन जनाले राष्ट्रपति पदमा उम्मेदावारी दिएका थिए । सिरियामा केही वर्षअघि देखि नै राष्ट्रपति असदका विरुद्धमा आन्दोलन चर्किएको थियो । (रासस/सिन्ह्वा)
