काठमाडौं । नेकपा (एमाले) का नेता भीम रावलले सरकार र राजनीति अस्थिर भएका बेला अमेरिकी सहयोग ‘मिलेनियम च्यालेन्ज कोअपरेसन’ (एमसीसी) अगाडि बढाउन खोज्नु देशप्रतिको गद्दारी भएको टिप्पणी गर्नुभएको छ ।

हालै एमसीए नेपालले एमसीसी अन्तर्गतको आयोजनाको काम अगाडि बढेको जनाएको थियो । नेता रावलले राष्ट्रहित विपरितको एमसीसीका आयोजना सम्झौता अनुमोदन नहुँदै अघि बढाउन खोजिएको प्रति आपत्ति जनाउनुभएको छ ।

शुक्रबार ट्वीट गर्दै रावलले लेख्नुभएको छ, ‘एमसीसीसँगको सम्झौतामा नेपालको राष्ट्रिय हित, स्वाधीनता, सुरक्षा र कानून विपरीत रहेका प्रावधान नहटाई राजनीति र सरकार अस्थीर भएकोबेला यसलाई अगाडि बढाउनु र तयारीको नाममा अनुमोदन नभएको सम्झौताका अयोजना अघि बढाउनु देशप्रतिको गद्दारी ठहर्छ।’

एमसीसीसंगको सम्झौतामा नेपालको राष्ट्रिय हित, स्वाधीनता, सुरक्षा र कानून विपरीत रहेका प्रावधान नहटाई राजनीति र सरकार अस्थीर भएकोबेला यसलाई अगाडि बढाउनु र तयारीको नाममा अनुमोदन नभएको सम्झौताका अयोजना अघि बढाउनु देशप्रतिको गद्दारी ठहर्छ।

— Dr. Bhim Rawal (@BhimRawal179) May 21, 2021

यस्तै, उहाँले राष्ट्रहित विपरित नागरिकताको प्रावधान खुकुलो बनाउन खोजिएको भन्दै आपत्ति जनाउनुभएको छ । प्रधानमन्त्री केपी ओलीले जसपासँग सहमति गरी अंगीकृत नागरिकका सन्तानलाई पनि बंशजको नागरिकता दिन विधेयक अगाडि बढाउन लागेको समाचारप्रति रावलले कटाक्ष गर्नुभएको हो ।

रावलले प्रधानमन्त्री ओलीले संसदमा विश्वासको मत लिने प्रावधानबाट भाग्न नमिल्ने पनि स्पष्ट पार्नुभएको छ ।

उहाँले लेख्नुभएको छ, ‘नेपालको संविधानको धारा ७६ (४)ऐच्छिक होइन बाध्यकारी हो । यसलाई छल्न मिल्दैन । नागरिकता देशको अस्मिता र अस्तित्वसँग गाँसिएको विषय हो । यसलाई कुर्सीको खेलसँग कदापि जोड्नु हुन्न । नगरिकताबारे संविधान सभामा धेरै बहस भई संविधानमा लेखिएको भन्दा फरक किसमले जानु नेपाल र नेपालीको हित विरूद्ध हुन्छ ।’