गाजासिटी । इजरायली लडाकु विमानहरूले सोमबार बिहानै गाजा सहरका धेरै ठाउँलाई लक्षित गरी भिषण आक्रमण गरेको छ ।
इजरायली प्रधानमन्त्री बेन्जामिन नेतन्याहूले गाजामा शासन गरिरहेका हमास समूहका विद्रोहीलाई लक्षित गरी थप सैन्य कारबाही गर्ने सङ्केत गरेसँगै हवाइ आक्रमण सुरु भएको हो ।
करिब १० मिनेटको अन्तरालमा गाजा सहरका उत्तरदेखि दक्षिणसम्मका विभिन्न स्थानमा भिषण हमला भएका थिए । अघिल्लो दिनभन्दा पछिल्लो पटक भएका आक्रमण ठुलो क्षेत्रमा फैलिएका छन् । हवाइ हमलामा अघिल्लो एकैदिन ४२ जना प्यालेस्टिनीको मृत्यु भएको थियो ।
इजरायली सेनाले गाजास्थित नौ जना हमास कमान्डरका घरलाई लक्षित गरी हवाइ आक्रमण गरिएको जनाएको छ । सोमबार बिहानै भएका पछिल्लो आक्रमणबाट कोही घाइते भए वा नभएको बारेमा स्पष्ट भइसकेको छैन ।
आइतबार टेलिभिजनबाट सम्बोधन गर्दै प्रधानमन्त्री नेतन्याहूले इजरायलले पूर्ण क्षमताका साथ हमास लडाकु विरुद्ध आक्रमण जारी राखेको बताउँदै यस आक्रमणमा अझै केही समय लाग्ने बताउनुभएको थियो । उहाँले हमासका विद्रोही समूहले ठुलो मूल्य चुकाउनुपर्ने बताउनुभएको थियो ।
हमासका विद्रोहीले पनि इजरायलमाथि दबाब कायमै राखेको छ । गाजा सहरका बस्तीबाट हमासका लडाकुले इजरायलमाथि दिनहुँ क्षेप्यास्त्र आक्रमण गरिरहेका छन् ।
यसअघि २०१४ मा हमास र इजरायलबीच भिषण युद्ध भएको थियो । तर यस पटकको विनास २०१४ को भन्दा विनासकारी रहेको दुबै युद्ध देखेका गाजामा आपतकालीन सेवामा सक्रिय समिर अलखातिबले बताउनुभयो ।
हमासले यसअघि गत सोमबार जेरुसेलममाथि क्षेप्यास्त्र प्रहार गर्न सुरु गरेको थियो, जसका कारण इजरायलले गाजामाथि भिषण कारबाही थालेको हो ।
गाजामा भएका सयौँ हवाइ आक्रमणबाट हालसम्म कम्तीमा १८८ जना प्यालेस्टिनीको ज्यान गइसकेको छ, जसमा ५५ जना बालबालिका र ३३ जना महिला छन् । आक्रमणबाट एक हजार २३० जना घाइते भएका छन् । गाजाबाट इजरायलतर्फ प्रहार गरिएका तीन हजारभन्दा बढी क्षेप्यास्त्रबाट हालसम्म आठ जनाको मृत्यु भएको छ ।
हमास र इस्लामिक जिहाद विद्रोही समूहले आफ्नातर्फ २० जना लडाकु मारिएको स्वीकार गरेका छन् तर इजरायली सेनाले यो भन्दा अझ ठुलो स्ख्यामा लडाकु मारिएको जनाएको छ ।
पछिल्ला आक्रमणबाट जोगिन झन्डै ३४ हजार प्यालेस्टिनीले आफ्ना घर छाडेका राष्ट्रसङ्घीय कूटनीतिज्ञ टोर वेनेसल्यान्डले राष्ट्रसङ्घीय सुरक्षा परिषद्लाई जानकारी गराउनुभएको छ ।
इजरायलमाथि दबाब दिने उद्देश्यले राष्ट्रसङ्घ सुरक्षा परिषद्बाट वक्तव्य जारी गर्ने चीन, नर्वे र ट्युनिसियाको प्रयासलाई संयुक्त राज्य अमेरिकाले रोकिदिएको छ । तर अमेरिकाले इजरायली आक्रमणप्रति चिन्ता व्यक्त गर्दै सावधानी अपनाउन आग्रह गरेको छ, तर सँगै इजरायलले आफ्नो सम्प्रभु र आत्मरक्षा गर्न पाउने अधिकार रहेको जनाएको छ ।
प्यालेस्टिनी विदेशमन्त्री रियाद अलमलिकीले सुरक्षा परिषद्समक्ष इजरायली आक्रमण रोक्नेतर्फ तत्काल पहल गरिदिन आग्रह गर्नुभएको छ । तर राष्ट्रसङ्घका लागि इजरायली राजदूत जिलाड एर्डानले राष्ट्रसङ्घसमक्ष इजरायल विरुद्ध आक्रमण रोक्न हमासलाई दबाब दिन आग्रह गर्नुभएको छ । (रासस–एपी)
