काबुल । अफगानिस्तानमा युद्धरत तालिबान समूहले इद पर्वको अवसरमा गरेको तीनदिने युद्धविराम आइतबार समाप्त भएको छ ।
इदका अवसरमा घोषणा गरिएको यस युद्धविरामको अवधिमा पनि हिंसात्मक झड्प र बमहमला भएका थिए, तर अधिकांश हिंसात्मक घटनाको जिम्मेवारी अफगानिस्तानमा सक्रिय अर्को इस्लामिक सङ्गठन इस्लामिक स्टेटले लिएको थियो ।
युद्धविराम समाप्त भएसँगै सरकार र तालिबानबिच शान्तिवार्ता पुनः सुरु गर्न राष्ट्रिय तथा अन्तर्राष्ट्रिय समुदायले दुबै पक्षलाई आह्वान गरेका छन् ।
तालिबानका राजनीतिक मामिलासम्बन्धी प्रवक्ता सुहेल शाहिनले सरकार र तालिबानका प्रतिनिधिबिच कतारमा पुनः भेटवार्ता भएको बताउनुभयो । दुबै पक्षले शान्तिको बारेमा आआफ्ना प्रतिबद्धता व्यक्त गरेको र रोकिएको वार्ता चाँडै सुरु गर्न सहमति जनाएको उहाँले बताउनुभयो ।
अमेरिकाले दुबै पक्षलाई शान्तिवार्ता जतिसक्दो चाँडो सुरु गर्न दबाब दिइरहेको छ । अमेरिकाले अफगानिस्तानमा तैनाथ करिब २५०० देखि ३००० सेना तथा नेटोले आफ्ना करिब सात हजार सेना आगामी सेप्टेम्बर ११ अघि नै फर्काउन थालेकाले पनि वार्ता प्रक्रिया जतिसक्दो चाँडो टुङ्ग्याउन अमेरिकाले दुबै पक्षलाई दबाब दिएको हो ।
पछिल्लो समय अफगानिस्तानमा इस्लामिक स्टेट समूह बढी सक्रिय देखिएको छ । देशका विभिन्न भागमा इस्लामिक स्टेटले बमहमला गरेर जनधनको ठुलो क्षति पुर्याएको छ ।
यसैबिच, शनिबार चीनका विदेशमन्त्री वाङ यीले पाकिस्तानी विदेशमन्त्री शाह महमुद कुरेसीलाई टेलिफोन गरी अफगानिस्तानबाट अमेरिकी र नेटो सैनिकको स्वदेश फिर्तापछिको अवस्थाका बारेमा चासो राख्नुभएको थियो ।
चिनियाँ विदेशमन्त्री वाङले विदेशी फौजको फिर्ती हतारमा भइरहेको र यसले अफगानिस्तानको शान्तिप्रक्रियामा गम्भीर असर पर्ने तथा क्षेत्रीय स्थायित्वमा नकारात्मक प्रभाव पर्ने बताउनुभएको थियो । उहाँले राष्ट्र सङ्घले आफ्नो भूमिका बढाउनुपर्नेमा जोड दिनुभएको थियो । (रासस–एपी)
