काठमाडौं । काठमाडौंको बूढानीलकण्ठ नगरपालिका–१० बालुवाखानीमा रहेको फेरिल्याण्ड इन्टरनेशनल स्कुलकी छात्रा कृतिका कटवालले तेश्रो रास्ट्रिय खुल्ला तेक्वान्दो प्रतियोगितामा कास्य पदक जितेकी छन् ।
यहि चैत १३ र १४ गते सुर्खेतमा भएको प्रतियोगितामा कटवालले ३३ केजी उमेर समूहमा तेस्राे हुँदै कास्य पदक जितेकी विद्यालयका खेल शिक्षक एवम् तेक्वान्दोका राष्ट्रिय रेफ्री दीपक दुलालले जानकारी दिनुभयो ।
उहाँका अनुसार सामान्य चोट लागेका कारण कृतिका फाइनल खेलमा जानबाट बञ्चित भएकी थिइन् । कक्षा ६ मा अध्ययनरत कृतिकाले यसअघि पनि विभिन्न प्रतियोगितामा मेडल हात पारिसकेकी छन् । गत वर्ष उनले माउन्ट एभरेष्ट नेशनल गेममा तेस्रो हुँदै पदक जितेकी थिइन् ।
नेपाल तेक्वान्दो संघ महिला सशक्तिकरण समितिको आयोजनमा भएको सो प्रतियोगितामा ५० भन्दा बढी टोलीका करिब ४ सय खेलाडीको सहभागिता रहेको थियो । प्रतियोगिताको उद्घाटन कर्णाली प्रदेशका मुख्यमन्त्री महेन्द्रबहादुर शाहीले गर्नुभएको थियो ।
कृतिकाको सफलताले विद्यालयको छवि थप उच्च बनाएको विद्यालयका प्रिन्सिपल विष्णुचन्द्र अधिकारीले बताउनुभयो । सो विद्यालयले नियमित रुपमा तेक्वान्दो प्रशिक्षण दिँदै आएको जानकारी दिँदै अन्य प्रतिभावान विद्यार्थीहरुले पनि मौका पाए थप सफलता प्राप्त गर्ने सम्भावना देखेको उहाँले बताउनुभयो ।
यस्तै, खेल शिक्षक दीपक दुलालले पनि खेलको माध्यमबाट विद्यालय र विद्यार्थीको नाम राख्न सफल भएकोमा खुशी व्यक्त गर्नुभयो ।‘उनको सफलताबाट हामीलाई निकै खुुशी लागेको छ’ शिक्षक दुलालले भन्नुभयो, ‘अब उनलाई वैदेशिक प्रशिक्षणमा जाने अवसर आउन सक्छ । राष्ट्रिय टोलीमा पर्ने सम्भावना पनि रहन्छ ।’
