काठमाडौं । राजधानी बाहिरबाट काठमाडौं प्रवेश गर्ने मुख्य नाका नागढुंगामा निर्माण हुने सुरुङमार्गको सुरुवात भएको छ । सोमबार प्रधानमन्त्री केपी ओलीले एक कार्यक्रमबीच सुरुङमार्गको सिलान्यास गरे ।
जापानी निर्माण कम्पनी हाज्मार आन्दो कर्पोरेसनले निर्माण गर्न लागेको संरचना आगामी साढे तीन वर्षमा सम्पन्न हुनेछ । सुरुङमार्ग जापान सरकारको सहुलियत ऋणमा निर्माण हुनलागेको हो । कम्पनीसँग यसअघि नै सम्झौता भएपछि आइतबारदेखि औपचारिक रुपमा काम सुरु भएको हो। सुरुङमार्ग निर्माणको लागि २२ अर्ब रुपैयाँ लागत अनुमान गरिएको छ। यसमध्ये १६ अर्ब रुपैयाँ जापानले सहुलियत ऋण प्रदान गर्ने र छ अर्ब रुपैयाँ नेपालले आन्तरिक स्रोतबाट जुटाउनेछ।
नेपालले जापानलाई शून्य दशमलव ०१ प्रतिशत मात्रै ब्याज तिर्ने सम्झौता भएको सडक विभागले जनाएको छ । उक्त परियोजनाको डीपीआरअनुसार सुरुङमार्ग थानकोटस्थित किसिपढी खोल्सीदेखि धादिङको सिस्नेखोलासम्म निर्माण हुनेछ । यसको लम्बाइ २ दशमलव ७ किमिको हुनेछ ।
पश्चिमतर्फ ५ सय ६५ मिटरको एप्रोच लिङ्क सडक र पूर्वतर्फ २ हजार ३ सय ७ मिटरको सडक निर्माण हुनेछ । सुरुङमार्गको क्यारिज वे ९ दशमलव ५ मिटरको हुनेछ । दुईवटा लेन हुनेछन् । सतुङगलबाट सुरुङमार्गको प्रवेशमार्गसम्म पुग्नका लागि दुईवटा फ्लाई ओभर निर्माण हुनेछ । सातवटा साना पुल र ११ वटा बक्स कल्भर्ट निर्माण हुने डीपीआरमा उल्लेख छ ।
