काठमाडौँ । अखिल नेपाल महिला सङ्घले भागरथी भट्टको बलात्कार हत्या प्रकरणका दोषीलाई हदैसम्मको कारबाही गर्न माग गरेको छ ।
महिला सङ्घले निर्मला पन्तजस्तो हुनेगरी घटनाको पुनरावृत्ति नगर्दै बेलैमा घटनाको छानबिन गरेर सत्य तथ्य पत्ता लगाउन पनि माग गरेको छ ।
महिला सङ्घकी अध्यक्ष मीना पुनको हस्ताक्षरमा २०७७ माघ २५ गते जारी प्रेसवक्तव्यमा घटनाको छानबिन गरी दोषीउपर कारबाहीको माग गरेको हो ।
प्रेसवक्तव्यको पूर्ण पाठ यस्तो छ–
“बैतडी दोगडाकेदार गाउँपालिका–७ चडेपानीकी १७ वर्षीया छात्रा भागरथी भट्टको बलात्कार गरी हत्या गरेको घटनाले अखिल नेपाल महिला सङ्घ गम्भीर र स्तब्ध भएको छ ।
श्री सनातन धर्म मावि श्रीकोटमा कक्षा १२ मा अध्ययनरत छात्रा भागरथीको स्कुल गएर फर्कने क्रममा जङ्गलमा बलात्कार गरी विभत्स हत्या गरिएको थियो । सङ्घले उक्त अपराधिक घटनाको घोर निन्दा र भत्र्सना गर्दछ । घटनाको गहिरो छानबिन गरी सत्य तथ्य पत्ता लगाई दोषीलाई कानुनी दायरामा ल्याउन र कडाभन्दा कडा कारबाही गर्न सरकारसँग जोडदार माग गर्दछौँ ।
दुई वर्षअघि कञ्चनपुरकी १३ वर्षीया निर्मला पन्तको बलात्कार गरी हत्या गरेको घटनाको अनुसन्धान गरी दोषीलाई कारबाही गर्ने र पीडित परिवारलाई न्याय दिने काम अझै हुन सकेको छैन । दुई वर्षपछि अहिले त्यही प्रदेशमा त्यही प्रकृतिको भागरथी घटना घटेको छ । यस सम्बन्धमा घटेको भागरथी घटनालाई निर्मला पन्तको घटनामा जस्तो गरी दोहोरिन नदिनका लागि गम्भीर ढङ्गले लिन र गहिरो छानबिन गरी छिटोभन्दा छिटो सत्य तथ्य बाहिर ल्याउन र अपराधीलाई हदैसम्मको कारबाही गर्न महिला सङ्घले सम्बन्धित निकायको गम्भीर ध्यानाकर्षण गराउँछौँ ।”
