धनविर पुन, नयाँ दिल्ली ।
राष्ट्रिय जनमोर्चाका महासचिव जनकराज शर्माले प्रधानमन्त्री केपी ओलीको संसद विघटनको कदमले प्रतिगमनलाई फाइदा पुग्ने बताउनुभएको छ । नेकपा भित्रको आन्तरिक कलह समाधान गर्न नसकेपछि ओलीले संसद विघटनको बाटो समातेको शर्माले बताउनुभयो ।
मूल प्रवाह अखिल भारत नेपाली एकता समाज अन्तर्गत रहेको अखिल भारत नेपाली विद्यार्थी संघ पश्चिमोत्तर क्षेत्रीय समितिद्वारा आयोजित ‘राष्ट्रियता, गणतन्त्र र धर्म निरपेक्षताको प्रश्न’ विषयक अन्तर्किया कार्यक्रममा महासचिव शर्माले ओलीको कदमविरुद्ध राष्ट्रिय जनमोर्चा सडकमा जाने स्पष्ट पार्नुभयो । प्रधानमन्त्रीले जस्तोसुकै सिफारिस गरेपनि राष्ट्रपतिले आँखा चिम्लिएर सदर गरिदिने प्रवृतिका कारण अहिलेको समस्या आएको उहाँले बताउनुभयो ।
‘प्रधानमन्त्रीले जे जस्तो सिफारिस गरेपनि राष्ट्रपतिले सरसल्लाह नगरीकनै सदर गरिदिने प्रवृतिका कारण यो सिफारिस पनि सदर भयो’ शर्माले भन्नुभयो ।
मूल प्रवाहका महासचिव ठाकुर खनालले संसद विघटनसँगै देशमा राजनीतिक अवस्था अत्यन्तै अस्थिरता तर्फ धकेलिएको बताउनु भयो । यो अवस्थामा देशमाथि विभिन्न देशी तथा विदेशी शक्तिहरुको चलखेल बढ्नेछ भन्दै उहाँले सम्पूर्ण देशभक्त शक्तिहरु एकजुट भई राष्ट्रियताको पक्षको आन्दोलनमा एकजुट हुन आवश्यक रहेको बताउनु भयो ।
अजय रेश्मीको सञ्चालन तथा शिवराज पाण्डेको अध्यक्षताबाट अगाडि बढको सो कार्यक्रममा सहभागिहरुलाई अमृता खरेलले स्वागत गर्नुभएको थियो । कार्यक्रममा मूल प्रवाहका सविच प्रेम पौडेल, सल्लाहकार धनवीर पुन, विद्यार्थी केन्द्रीय सहसचिव कृष्टि राई, क्षेत्रीय सहसचिव शिव केसी, विद्यार्थी केन्द्रीय सदस्य दिपक भुसाल लगायतले मन्तव्य दिनुभएको थियो ।
