थम्मन थापा, बागलुङ ।
अन्तर्राष्ट्रिय स्तरमा सक्रिय रहेका बागलुङ, पर्वत र म्याग्दी समाजले आपसी सहकार्य गर्दै र जिल्लामा विकास र सामाजिक हितमा साझा अवधारणा र हातेमालो गर्ने योजनाका साथ छलफल प्रारम्भ गरेका छन् ।
आइतबार सम्पन्न भर्चुअल बैठकमा तीन जिल्लाका अन्तर्राष्ट्रिय समाजका प्रमुख तथा पदाधिकारीहरु सहभागी बैठक सो सहमतिमा पुगेको हो । समितिहरुबीच आपसि संस्थागत परिचय, सहकार्य, कालिगण्डकी नदी संरक्षण, कालिगण्डकी सभ्यता, आ–आफ्ना जिल्लाका पर्यटन पवर्द्धनका क्षेत्रमा जोडिएका स्थानीय निकायहरुको फोहर व्यवस्थापनमा संस्थाहरु मार्फत के कस्तो सहयोगी भूमिका निभाउन सकिन्छ भन्ने छलफल भएको थियो ।
आउँदा दिनहरुमा छलफललाई अगाडि बढाउँदै स्थानीय निकायहरु सहितको छलफल कार्यक्रमको लागि पहल गर्ने र आपसी सहकार्य र संस्थागत सम्बन्धलाई ठोस गर्दै सहकार्यका योजना गर्न सहमति समेत भएको छ । बैठकमा अन्तर्राष्ट्रिय बागलुङ समाजका अध्यक्ष एकराज गिरीले जोडिएका तीन जिल्ला बागलुङ, पर्वत र म्याग्दीको लागि परदेशमा भएपनि सहकार्य गरेर जानु पर्नेमा जोड दिँदै युरोपको फोहोर व्यवस्थापनको अनुभव सुनाउनुभयो ।
गिरीले यस्ता प्रकारका सिप तथा योजना बागलुङ, पर्वत र म्याग्दीमा लैजानको लागि संयुक्त पहल गर्नुपर्ने आवश्यकता औँल्याउनुभयो । अन्तर्राष्ट्रिय म्याग्दी प्रवासी संघ (मोना) का अध्यक्ष ओम जुग्जाली मगरले बागलुङ, पर्वत र म्याग्दीमा दुःख वा अप्ठ्यारो पर्दा हातेमालो गरेर अघि बढ्नु पर्नेमा जोड दिनुभयो । अन्तर्राष्ट्रिय पर्वत समाजका उपाध्यक्ष दीपिका भूषालले स्थानीय निकायहरुसँग मिलेर स्थानीय समुदायलाई आय आर्जन हुने कार्यहरु गर्नुपर्ने भनाई राख्नुभयो ।
सो बैठकमा म्याग्दी समाजका बरिष्ठ उपाध्यक्ष मिम पुर्जा, महासचिव विक्रम कार्की, बागलुङ समाजका उपाध्यक्ष बेलुकाजी थापा, सचिव प्रेम सागर, यूरोप संयोजक महेन्द्र खड़का लगायतले तीन जिल्लाका समाजबीच सहकार्य हुनुपर्ने र यस्ता बैठक भैराख्नुपर्ने भनाई राखेका थिए । बागलुङ समाजका महासचिव देब पौडेल (देबु) को सञ्चालनमा संयुक्त बैठक भएको थियो ।
