काठमाडौं । जिल्ला प्रहरी कार्यालय कैलालीको हिरासतमा रहेका कैदीबन्दीमध्ये पुरानाले नयाँलाई कम्बल ओढाएर कुट्ने गरेको थाह भएको छ । हिरासतमा जानेबित्तिकै बन्दीहरुले नवआगन्तुकलाई बस्सरी भकुर्ने गरेको एक बन्दीले गुनासो गरेका छन् ।

पुराना बन्दीले नयाँलाई कुट्ने क्रममा प्रहरी भने मुकदर्शक भएर बस्ने गरेको उनले गुनासो गरे ।

केही दिन अघि जिप्रका कैलालीको हिरासतबाट छुटेका एक बन्दीले युगदर्शनलाई सुनाए, ‘हिरासतमा बन्दीहरुको चाप रहेछ । त्यहाँ नयाँ जाने बन्दीलाई पुरानाले जानेबित्तिकै कम्बल ओढाएर भकुर्ने रहेछन् । प्रहरीले पनि देखेको नदेख्यै गर्ने रहेछ ।’

ती बन्दीले आफूले पनि कुटाइ खाएको तर, प्रहरीलाई जानकारी दिएपनि खासै वास्ता नगरेको बताए । आफूभन्दा पहिला गएका एक जनालाई भक्कुृ कुटेको देखेपछि पहिल्यै सतर्क भएका कारण धेरै कुटाई खान नपरेपनि प्रहरीको व्यवहारले चिन्तित बनाएको उनले गुनासो गरे । कुटपिटबाट एक बन्दी घाइतेसमेत भएको उनको भनाई छ ।

नाम उल्लेख नगर्ने सर्तमा उनले भने, ‘पुराना बन्दीहरुले कुट्न खोजेपछि मैले प्रतिकार गरेँ । त्यसक्रममा हो–हल्ला भयो । प्रहरीलाई जानकारी गराउँदा मलाई नै ‘दादा बन्छस् ?’ भन्दै हप्काए ।’

जिल्ला प्रहरी कार्यालय कैलालीको हिरासतमा क्षमताभन्दा बढी कैदीबन्दी रहेको बुझिएको छ । बन्दीका अनुसार हिरासतमा राम्रोसँग खुट्टा पसारेर सुत्नसमेत पाइँदैन । हिरासतमा चुरोट र सुर्ती खानेहरुले फोहोर गरिरहेका हुन्छन् । उनका अनुसार चुरोट, सुर्तीको व्यवस्था भने प्रहरीले गरिदिने गरेका छन् ।

उनले भने, ‘बाहिर १०/१५ रुपैयाँ पर्ने चुरोट सुर्तीलाई भित्र सय/दुई सय रुपैयाँ पर्ने रहेछ । त्यसको व्यवस्था पनि प्रहरीले नै गर्दा रहेछन् ।’

यता जिल्ला प्रहरी कार्यालय कैलालीका डीएसपी प्रतिक विष्टले भने हिरासतमा नयाँ बन्दीहरुमाथि कुटपिट हुने गरेको आफूहरुलाई जानकारी नभएको दाबी गर्नुहुन्छ ।

‘कहिलेकाहीँ हो-हल्ला त हुन्छ, तर, कुटपीट गरेको भन्ने जानकारी छैन’ डीएसपी विष्टले भन्नुभयो, ‘हामीले नियमित हेरिरहेकै हुन्छौँ । हामी जानासाथ सबै भलाद्मी भएर बस्ने गरेको देखिन्छ ।’

उहाँले बन्दीहरुलाई कुनै समस्या भए सम्बन्धित ठाउँमा गुनासो गर्न आग्रह गर्दै गुनासो आएमा त्यसबारे छानबिन गर्ने बताउनुभयो ।

जिल्ला प्रहरी कार्यालयको हिरासतमा अहिले करिब एक सय जनाजति बन्दीहरु छन् । डीएसपी विष्टका अनुसार हिरासतको क्षमता २५० जनाको हो ।

हिरासतमा मानिसहरु कोचाकोच गर्नुपर्ने अवस्थाबारे विष्टले भन्नुभयो, ‘राज्यको सिमित स्रोत साधनमै हामीले व्यवस्था गर्ने हो । कारागारमा हेर्नुस् त अवस्था कस्तो छ ?’