खिमराज चालिसे, चंडिगढ ।
उपचारका क्रममा बेखर्ची भएर दुई महिनाभन्दा लामो समयदेखि अस्पतालमै बस्न बाध्य एक नेपालीलाई मूल प्रवाह अखिल भारत नेपाली एकता समाजले उद्धार गरी घर पठाएको छ । जाजरकोट जिल्लाको साविक रिसान गाविस वडा नम्वर ६ निवासी ५५ वर्षीय मोतीराम क्षेत्रीलाई एकता समाजले अस्पतालबाट निकालेर घर पठाएको हो ।
करिब दुई महिनाअघि विकानेरमा कारको ठक्करले खुट्टा भाँचिएका क्षत्री त्यहाँको सरकारी अस्पतालमा भर्ना भएका थिए । तर, खर्च अभावका कारण उनी अस्पतालबाट निस्किन सकेका थिएनन् ।
मूल प्रवाह विकानेर नगर समिति, हनुमानगढ़ नगर समिति र श्रीगंगानगर नगर समितिको संयुक्त पहलमा उनलाई लत्ताकपडासहित ७ हजार ५२० रुपैयाँ सहयोग प्रदान गरी घर पठाइएको हो । सो नगद मूल प्रवाहका कार्यकर्ताहरुबाट उठाइएको थियो भने श्रीगंगानगरदेखी कृष्णनगर सम्मको बसभाडा श्रीगंगानगर नगर समितिका अध्यक्ष गिरुप्रसाद न्यौपाने र विकानेर नगर समितीका अध्यक्ष लोक बहादुर पाण्डेले सहयोग गर्नुभएको हो ।
गंगानगर नगर समितिका सचिव बसन्त भणडारीका अनुसार क्षेत्री गत १५–१६ महिनादेखि नै बेखर्ची अवस्थामा थिए । लकडाउनपछि झनै दयनीय अवस्थामा पुगेका उनको कारको ठक्करबाट खुट्टा भाँचिएको छ । ठक्कर दिने कार भने भागेको भण्डारीले बताउनुभयो ।
उनी हस्पिटल भर्ना भएको खबर मूल प्रवाह विकानेर नगर समितीलाई जानकारी भएपछि नगर समितिका अध्यक्ष लोक बहादुर पाण्डे, रामप्रसाद पोख्रेल, बोम बहादुर विष्ट लगायत नेताहरु हस्पिटल पुग्नुभएको थियो ।
उनलाई स्वदेश पठाउन हनुमानगढ़ नगरसमितीका अध्यक्ष मोहन रसाइली र श्रीगंगानगर नगर अध्यक्ष गिरुप्रसाद न्यौपानेसँग सहकार्य गरि हिजो ७ डिसेम्बरमा स्वदेश पठाइएको हो । पीडितको साथमा नेपाल सीमासम्म पुग्नेगरी मोहन रसाइली र बसन्त भण्डारीलाई पनि मूल प्रवाहले पठाएको छ ।
