काठमाडौं । भारतको दिल्ली राज्यका मुख्यमन्त्री अरविन्द केजरीवाल आफ्नै घरमा नजरबन्दमा परेका छन् । केजरीवालको आम आदमी पार्टीले पत्रकार सम्मेलन गरी उनलाई ‘हाउस एरेस्ट’ गरिएको जानकारी दिएको हो ।

बीबीसी हिन्दीका अनुसार गृह मन्त्रालयको आदेशमा उनलाई नजरबन्दमा राखिएको हो । भारतमा चलिरहेको किसान आन्दोलनलाई समर्थन गरेका कारण भाजपा सरकारले उनलाई नजरबन्दमा राखेको जनाइएको छ ।

यता दिल्ली प्रहरीले भने केजरीवाललाई हाउस अरेस्ट नगरेको दाबी गरेको छ ।

दिल्ली पुलिसका डीसीपी (नर्थ) एंटो अल्फ़ोंसले भनेका छन्, ‘प्रहरीको तैनाथी अन्य कारणले गरिएको हो । आम आदमी पार्टी र अरु कुनै पार्टीका बीच टकरावको स्थिति पैदा नहोस् भन्नका लागि सावधानीपूर्वक प्रहरी बल बढाइएको हो । मुख्यमंत्रीलाई हाउस अरेस्ट गरिएको छैन ।’