प्युठान । प्युठानमा राष्ट्रिय अपाङ्ग सेवा संघ प्युठानको तीन तले नयाँ भवन निर्माण भएको छ । राष्ट्रिय जनमोर्चाका उपाध्यक्ष एवं प्युठानबाट निर्वाचित प्रतिनिधि सभा सदस्य माननीय सांसद दुर्गा पौडेलले मंगलबार सो भवनको उद्घाटन गर्नुभएको छ ।
३२ लाख १० हजार रुपैयाँको लगतमा निर्मित भवन निर्माणका लागि मल्लरानी गाउँपालिकाका भरतकुमार श्रेष्ठले दुई आना जग्गा निशुल्क दिनुभएको थियो ।संघको भवन निर्माणका लागि अध्यक्ष जुमानसिंह केसीको नेतृत्वमा समिति गठन भइ विभिन्न निकायमा सम्पर्क समन्वय गरि आर्थिक सहयोगको व्यवस्था गरि निर्माण थालिएको अध्यक्ष केसीले जानकारी दिनुभयो ।
२०७२ सालमा शिलान्यनस भएपनि अर्थिक स्रोतको अभावमा भवनले पूर्णता पाउन सकेको थिएन । केसीका अनुसार सांसद दुर्गा पौडेलको स्थानीय पूर्वाधार विकास कोषबाट १० लाख रुपैयाँ प्राप्त भएपछि भवन निर्माणले गति लिएको हो ।
भवन निर्माणका लागि मल्लरानी गाउँपालिकाले सात लाख २० हजार, तत्कालिन जिल्ला विकास समितिको कार्यालय बाट रु ४ लाख, महिला, बालबालिका तथा जेष्ठ नागरिक मन्त्रालयले ३ लाख, तत्कालिन जिल्ला प्राबिधिक कार्यालयबाट रु १ लाख ७० हजार, प्युठान नगरपालिकाले ५० हजार, प्युठानका साविक गाविसहरुबाट चार लाख २० हजार र चन्दा संकलनबाट ४० हजार रुपैयाँ संकलन भएको थियो ।
यस्तै, राष्ट्रिय अपांग सेवा संघका कर्यसमितीबाट सहयोग रु २५ हजार गरि जम्मा ३१ लाख ७० हजार जुटाएर भवन निर्माण सम्पन्न गरिएको हो। संघमा अन्य स्रोत नभएकोले रु ८० हजार संघ ऋणमा रहेको बताइएको छ ।
संघले २०७१ सालदेखि शारीरिक अपाङ्गता भएका बालबालिकालाई आवासगृह मार्फत शिक्षा प्रदान गर्दै आएको छ । अर्थिक स्रोतको अभावमा गुणस्तरीय सेवा सन्चालनमा कठिनाइ भएकोले सहयोगको लागि अपील समेत गरिएको थियो।
उद्घाटन कार्यक्रममा बोल्दै सांसद पौडेलले समाजमा पछाडी परेका र पारिएका वर्गको उत्थान र विकासका लागि सबै एकजुट हुनु पर्ने बताउनु भयो । उहाँले सिमित स्रोतलाई अधिकतम रुपमा प्रयोग गरि सामाजिक सेवाको भावना अनुसार काम गरेको देख्न पाएकोमा खुशी व्यक्त गर्नु भयो । साथै उहाँले अपाङ्गता भएका ब्यक्तिको विकासको निम्ति आफूले सक्दो सहयोग गर्ने प्रतिबद्धता जनाउनु भएको थियो ।
