काठमाडौं । विश्वभर छरिएर रहेका नेपालीहरु मध्ये २ सय ९९ जनाको कोरोना संक्रमणका कारण मृत्यु भएको छ । यो साता थप ६ जना गैरआवासीय नेपालीको निधन भएसँगै विदेशमा मृत्यु हुने नेपालीको संख्या २ सय ९९ पुगेको हो ।
गैरआवासीय नेपाली संघका अनुसार यो साता साउदी अरबमा ४ जना, पोर्चुगलमा १ जना र बेलायतमा १ जना नेपालीको कोरोना भाइरसका कारण मृत्यु भएको हो । हालसम्म विभिन्न १९ मुलुकमा रहेका नेपालीको निधन भएको एनआरएनएले जनाएको छ ।
गैरआवासीय नेपाली संघ अन्तर्गतको स्वास्थ्य समितिका संयोजक डा. सन्जीव सापकोटाका अनुसार यो साता जापान, युके, स्पेन, साइप्रस, रोमानिया, कतार, यूएई र साउदी अरबमा रहेका नेपालीमा कोरोना संक्रमण देखिएको छ ।
शनिबार साँझसम्म विभिन्न ४५ मुलुकमा ४७ हजार ५ सय ८३ जना गैरआवासीय नेपाली संक्रमित भएकोमा हालसम्म ४३ हजार ५ सय ७४ जना कोरोना संक्रमणबाट मुक्त भएका छन् । यो कुल संक्रमितमध्येको ९१ प्रतिशत रहेको छ ।
हालसम्म नेपालमा कोरोना संक्रमणमुक्त हुनेको कुल संख्या २ लाख ११ हजार १ सय ८६ पुगेको छ । तीमध्ये २ लाख ३० हजार ७ सय २३ जना कोरोना मुक्त भएका छन् । नेपालमा कोरोना संक्रमणबाट मुक्त हुनेको संख्या ९२ दशमलव ५ प्रतिशत रहेको छ । नेपालमा कोरोना भाइरसको संक्रमणको कारणले १ हजार ४ सय ५४ जनाको ज्यान गएको छ ।
