काठमाडौँ । कोभिड रोगसित जुधिरहेका तथा सो रोगबाट विजय प्राप्त गरेका क्यान्सर सर्भाइबरलाई लक्षित गरी भर्चुअल कार्यक्रम सम्पन्न भएको छ । अवारनेस एन्ड एक्पेरियन्स सेयरिङ वेबिनार नाम दिइएको सो कार्यक्रम यही शुक्रवार सम्पन्न भएको हो ।

कार्यक्रममा ह्याम्स हस्पिटलका डा. राजु पङ्गेनी (एमडी, डिएम पल्मनोलोजी र पाटन एकेडमी अफ हेल्थ साइन्सका डा. अरुण शाही (एमपिएच, एमडी मेडिकल अन्कोलोजी) को उपस्थिति रहेको थियो ।

दीर्घरोगीहरू कोभिडबाट बच्न विभिन्न सचेतनालाई ध्यान दिनुपर्ने बताउदै डा. पङ्गेनीले ‘कोभिड भएको ९ दिनपछि भाइरस सर्ने क्षमता नरहेको’ बताउनुभएको थियो । भाइरसका कारण अनौठो प्रकारका लक्षण देखिरहेको बताउँदै उहाँले ‘एकचोटी भाइरस भएपछि दोहोरिने सम्भावना एकदमै न्यून भएको’ उहाँको धारणा थियो । तर दोहोरिएको अवस्थामा बिरामीलाई अझ बढी सिकिस्त बनाउने वहाँको तर्क थियो । बिरामीले केहि भएको छैन भन्ने तर अक्सिजनको मात्रा एकदमै कम भएर बिरामी एकदमै सिकिस्त बनाउने हुनाले यो रोगलाई साइलन्ट किलर पनि भन्ने सकिने डा. पङ्गेनीको धारणा थियो । डाक्टरको सल्लाह बिना कुनै एन्टिबायोटिक खान नहुने बताउदै उहाँले आवश्यकतानुसार रेम्डेसिभर, स्टेरोइड र रगत पगाल्ने इन्जेक्सन दिने गरिएको बताउनुभयो । अक्सिजन कम भएमा घरमा घोप्टो परेर तथा कोल्टे फेरर सुत्दा केही अक्सिजनको मात्रामा सुधार हुन सक्ने उहाँले बताउनुभयो ।

सो वेबिनारलाई सम्बोधन गर्दै डा. अरुण शाहीले नियमित रूपमा किमो, ब्लड क्यान्सर, बोन मेरो ट्रान्सफरका बिरामीलाई कोभिडले आक्रमण गर्ने बढी सम्भावना हुने बनाउनुभयो । कोभिडभन्दा पनि क्यान्सरको रोग खतरनाक भएकाले विभिन्न स्वास्थ्यसम्बन्धी मापदण्ड पुराएर क्यान्सर रोगको उपचारलाई निरन्तरता दिनुपर्ने उहाँको धारणा थियो । ‘क्यान्सरको बिरामीसित बस्दा आफू तथा आफ्नो सम्पूर्ण परिवारलाई नै कोभिड–१९ ले आक्रमण गरेको’ आफ्नो अनुभव सुनाउँदै उहाँले ‘कोभिड–१९ सित डराउने होइन, सहज रूपमा स्वीकार गर्नुपर्ने’ बताउनुभयो ।

क्यान्सर सर्भाइबर रुबी क्षेत्री र शोभाको सञ्चालनमा अगाडि बढेको सो कार्यक्रममा क्यान्यसर सर्भाइबर सिर्जना लुइँटेल, सीता ढकाल, कमल पौडल र दियालो साहित्य सरगमकी अध्यक्ष शान्ति शर्माले कोभिडबाट विजय प्राप्त गरेको अनुभव सुनाउनुभएको थियो ।

कार्यक्रममा नेपाल क्यान्सर सर्भाइबर सोसाइटीकी कोषाध्यक्ष बिनु केसीले स्वागत मन्तव्य राख्नुभएको थियो भने अर्की सदस्य सजिना पाण्डेले धन्यवाद मन्तव्य राख्नुभएको थियो ।

नेपाल क्यान्सर सर्भाइबर सोसाइटीका कोषाध्यक्ष बिनु केसीले सो संस्था क्यान्सर विजेता तथा क्यान्सरसित जुधिरहेको सामाजिक संस्था भएको बताउनु्भयो । उहाँका अनुसार सो संस्थाले आर्थिक रूपमा कमजोर क्यान्सर बिरामीलाई आर्थिक सहयोग गर्नेदेखि लिएर क्यान्सर बिरामीलाई सकारात्मक काउन्सिलिङ, डाक्टरसित अन्तरक्रिया गर्ने, स्कुल र कलेजमा गएर स्क्रिनिङलगायत स्वास्थ्यसम्बन्धी विभिन्न सचेतनामूलक कार्यक्रम यो संस्थाले गर्दै आइरहेको छ ।