वासिङटन । अमेरिकी राष्ट्रपति डोनाल्ड ट्रम्पले इलेक्टोरल कलेज (निर्वाचक प्रतिनिधि) हरूले आफ्ना प्रतिस्पर्धी जो बाइडेनले जितेको औपचारिक घोषणा गरेमा ह्वाइट हाउस छाड्ने सङ्केत गरेका छन् ।
निर्वाचनमा धाँधली भएको आरोप लगाउँदै आएका ट्रम्पले औपचारिक रूपमा अझै आफ्नो पराजय भने स्वीकार गरेका छैनन् । यद्यपि यसअघि उनले सत्ता हस्तान्तरणको प्रक्रिया सुरु गर्नेमा आफ्नो सहमति जनाएक थिए ।
ट्रम्पले चुनावको नतिजालाई अस्वीकार गर्ने अभूतपूर्व प्रयास गरेका थिए । चोरी मतपत्रको बारेमा भ्रम फैलाउँदै र अदालतमा शृङ्खलाबद्ध मुद्दा दायर गरेर कानुनी चुनौती दिएका थिए । तर अदालतले ट्रम्पले लगाएका आरोपमा पर्याप्त प्रमाण नपुगेको जनाउँदै निवेदन खारेज गरिदिएका थिए ।
हाल राष्ट्रपति ट्रम्पले दिएको पछिल्लो अभिव्यक्तिबाट उनी पराजय स्वीकार गर्नेनजिक पुगेको मान्न थालिएको देखिएको छ । यसै सन्दर्भमा बाइडेनले जितेको कुरा इलेक्टोरल कलेजले औपचारिक पुष्टि गरेमा आफू ह्वाइट हाउसबाट बाहिरिने ट्रम्पले बताएका हुन् ।
इलेक्टोरल कलेजको बैठक आउँदो डिसेम्बर १४ का दिन हुँदै छ ।
अमेरिकी राष्ट्रपतिमा विजयी हुने उम्मेदवारको औपचारिक छिनोफानो इलेक्टोरल मतले गर्दछ । हाल डेमोक्रेटिक पार्टीका प्रत्यासी जो बाइडेनले ३०६ र डोनाल्ड ट्रम्पले २३२ मत प्राप्त गरेका छन् । संविधानअनुसार कुल ५३८ इलेक्टोरल मत रहेको अमेरिकामा २७० मत ल्याउने व्यक्ति राष्ट्रपतिमा निर्वाचित हुन्छन् ।
नयाँ राष्ट्रपतिले आगामी २०२१ को जनवरी २० मा सपथ ग्रहण गर्ने छन् । त्यसयता जो बाइडेन राष्ट्रपति–निर्वाचितको रूपमा रहने छन् । (रासस/एएफपी)
